Tasqyn júıesi boıynsha alǵashqy sý tasqyny boljamy aqpan aıynda jarııalanady

ASTANA. KAZINFORM – Elimizdiń 4 mınıstrligi birlesip, sý tasqynyn boljaýǵa jáne modeldeýge múmkindik beretin Tasqyn aqparattyq júıesin ázirleýde. Bul týraly Sý resýrstary jáne ırrıgatsııa mınıstrligi habarlady.

Qazir júıe jahandyq GloFAS sý tasqyny týraly eskertý júıesine qosylǵan. 

− Tasqyn júıesi 135 ózen boıynsha sý tasqyny kezeńine qatysty uzaqmerzimdi boljam alýǵa múmkindik beredi. Birinshi boljam shamamen aqpan aıynyń basynda, ekinshisi – naýryzdyń basynda beriledi. Bizdiń mınıstrlik Esil ózeniniń Sergeev sý qoımasynan tómen bóligin, Jaıyq ózeniniń Oral qalasynan ıAnvartsevo gıdroposty baǵytyndaǵy bóligin jáne Nura ózeniniń Qoshqarbaev aýylynan tómen Orazaq aýylyna deıingi ýchaskelerin batımetrııalyq túsirilim jumystaryn aıaqtady, - dedi mınıstrliktiń resmı ókili Móldir Ábdýálıeva Ortalyq kommýnıkatsııalar qyzmetinde ótken brıfıngte.

Jınaqtalǵan málimetter sý tasqynyn boljaý úshin de paıdalanylatyn bolady.

Sonymen qatar, Tasqyn júıesinde jumys isteý úshin sý tasqynyn boljaý jáne modeldeý ádistemesi ázirlenip, bekitildi. Oǵan sáıkes, quzyrly organdar júıege sý aıdyndaryndaǵy sý deńgeıi, sý jiberý kólemi jáne gıdrometeoboljam boıynsha málimetterdi engizedi.

Osyǵan deıin elimizdiń barlyq sý qoımalary sý tasqyny kezeńine daıyndalyp jatqany týraly jazdyq.