Tasqyn aqparattyq júıesi 10 oblysta sý tasqyny jaǵdaıyn boljaýǵa múmkindik berdi
ASTANA. KAZINFORM – Tasqyn aqparattyq júıesi bıyl 14 naýryz ben 18 sáýir aralyǵynda Qazaqstannyń 10 oblysyndaǵy sý tasqyny jaǵdaıyn boljap, modeldedi.
Bul jergilikti atqarýshy organdar men tótenshe jaǵdaılar departamentterine erigen sýdyń kelýine daıyndalyp, aýqymdy sý tasqynynyń aldyn alýǵa múmkindik berdi.
Modeldeý Batys Qazaqstan, Aqtóbe, Qostanaı, Soltústik Qazaqstan, Pavlodar, Shyǵys Qazaqstan, Aqmola, Qaraǵandy, sondaı-aq Abaı jáne Ulytaý oblystarynyń eldi mekenderine júrgizildi. Bul rette júıe Aqmola jáne Soltústik Qazaqstan oblystaryndaǵy naqty sý basqan 16 eldi mekenniń 9-yna aldyn ala boljam jasady.
Tasqyn júıesi tasqyn sýdy modeldeý kezinde ózenderdegi boljamdy sý shyǵyny men deńgeıin, qoımalardan sý jiberý kólemin, jer bederiniń tsıfrlyq modelderin jáne batımetrııalyq túsirilim derekterin paıdalanady. Sý resýrstary jáne ırrıgatsııa mınıstrligi sý tasqyny kezinde kún saıyn aqparattyq júıege derekterdi engizý jáne jańartý arqyly sý qoımalarynyń jaı-kúıine monıtorıng júrgizdi. Sondaı-aq vedomstvo shekara mańyndaǵy eldermen ózara is-qımyl jasap, TJM men onyń aýmaqtyq bólimshelerin tótenshe jaǵdaılardyń týyndaý qaýpi týraly ýaqtyly habardar etip otyrdy.
«Boljamdardyń dáldigin arttyrý jáne Tasqyn júıesin qamtýdy keńeıtý úshin ýákiletti memlekettik organdar ony odan ári damytý úshin usynystar ázirledi. Tsıfrlyq jer bederiniń anyqtyǵyn arttyrý, gıdrologııalyq modeldi jetildirý jáne beıimdeý, júıeni jańǵyrtýǵa baǵyttalǵan is-sharalar engizilgen Jol kartasynyń jobasy ázirlendi. Tasqyn aqparattyq júıesin jetildirý jumysy turaqty negizde júrgizilip jatyr jáne aldaǵy ýaqytta da jalǵasyn tabady», – dedi Sý resýrstary jáne ırrıgatsııa mınıstri Aslan Abdraımov.
Aıta keteıik, buǵan deıin Tasqyn júıesi 251 ózenniń sý deńgeıin baqylap otyrǵanyn jazǵanbyz.