Tasmaǵambetov Táýelsizdiktiń 25 jyldyǵyn merekeleý jóninde keńes ótkizdi
ASTANA. QazAqparat - Qazaqstan Premer-Mınıstriniń orynbasary Imanǵalı Tasmaǵambetov mınıstrlikter men vedomstvolar basshylarynyń qatysýymen keńes ótkizdi, dep habarlaıdy primeminister.kz.
«Bizdiń elimiz úshin Táýelsizdik aıryqsha mańyzǵa ıe. Bul mereıtoı erekshe mereke retinde Tuńǵysh Prezıdentimizdiń jańa Qazaqstannyń qalyptasýyna qosqan qomaqty úlesin kórsetedi. Kez-kelgen mereıtoılyq kezeń - bul ótken jolymyzdy saralap, bolashaǵymyzdy baǵamdaýǵa berilgen úlken múmkindik», - dep atap ótti I. Tasmaǵambetov.
Atalǵan keńes barysynda Premer-Mınıstrdiń orynbasary áleýmettik salanyń birqatar ózekti máselelerine toqtaldy. Elimizdiń áleýmettik-ekonomıkalyq damýynyń basym baǵyttaryn aıta kele, vıtse-premer bilim jáne ǵylym, medıtsına, mádenıet pen sport salalaryn damytýdaǵy mindetterdi sheshý qajettigine toqtaldy. Sonymen birge, Tasmaǵambetov kásiptik jáne tehnıkalyq bilim berý júıesiniń bedelin kóterý qajettigine nazar aýdardy.
2018 jylǵy 1 qańtardan bastap, turǵyndardy mindetti áleýmettik medıtsınalyq saqtandyrý júıesin endirý máselesi de baıypty jumysty qajet etedi.
Keńeste eldegi rýhanı-ıdeologııalyq qalyptasý máselesi, memlekettik aqparat saıasatynyń jańa baǵdary men «Mádenı mura» baǵdarlamasyn ustaný máselesi keńinen talqylandy.
