Tasmaǵambetov RF-men yntymaqtastyq jóninde: týysy jaqyn jaqyn emes, qonysy jaqyn – jaqyn
ASTANA. QazAqparat - Máskeýde Qazaqstan men Reseı arasynda dıplomatııalyq qarym-qatynastardyń ornatylǵanyna 25 jyl tolýyna arnalǵan halyqaralyq ǵylymı-tájirıbelik konferentsııa ótti. Máskeý Memlekettik halyqaralyq qatynastar ınstıtýtynda (Ýnıversıtet) ótken sharany RF-daǵy Qazaqstan Elshiligi uıymdastyrdy, dep habarlaıdy QazAqparat qazaqstandyq dıplomatııalyq ókildikke silteme jasap.
Jıyndy bastaǵan Qazaqstannyń Reseıdegi Tótenshe jáne ókiletti elshisi Imanǵalı Tasmaǵambetov eki memlekettiń baılanysy tereńde jatqanyn, osy ýaqyt aralyǵynda berik rýhanı negiz qalyptasyp úlgergenin, sondaı-aq shırek ǵasyr aralyǵynda Qazaqstan men Reseı arasynda 300-ge tarta ekijaqty kelisim jasalǵanyn erekshe atap ótti.
"Ekijaqty baılanystyń ornaýy eki eldiń máseleni sheshýde qoldanatyn áreket amaldaryna baılanysty. Ózge elderde oń sheshimin tappaǵan túıtkildi másele Qazaqstan men Reseı arasynda bolǵan emes", - dedi Imanǵalı Tasmaǵambetov. Osy rette elshi «týysy jaqyn jaqyn emes, qonysy jaqyn - jaqyn»", - degen maqaldy tilge tıek etti.
Óz kezeginde sóz alǵan MMHQI rektory Anatolıı Torkýnov Reseı men Qazaqstan buryńǵy keńes memleketteri arasynda qaýqaryn myqtaǵan memleketter ekenin aıta kele, táýelsizdik alǵaly beri eń jaqyn seriktes bolǵanyna da erekshe toqtaldy.
Shırek ǵasyr ishinde Qazaqstan men Reseı arasynda 300-ge jýyq ekijaqty kelisim jasaldy, olardyń arasynda eki el arasyndaǵy strategııalyq yqpaldastyqty nyǵaıta túsýge negiz salǵan kelesi qujattar bar: Dostyq, yntymaqtastyq jáne ózara kómek týraly shart (1992), HHІ ǵasyrǵa baǵdarlanǵan máńgilik dostyq pen odaqtastyq týraly deklaratsııa (1998) jáne HH ǵasyrdaǵy tatý kórshilestik pen odaqtastyq týraly kelisim (2013).
Atalǵan sharaǵa RF Prezıdent ákimshiliginiń ókilderi, qos eldiń dıplomattary, beldi sarapshylary men jýrnalıster qatysty.
