Tasmaǵambetov qysqy Ýnıversıada daıyndyǵynyń qorytyndysyn shyǵardy
ASTANA. QazAqparat - Búgin, 19 qańtarda Qazaqstan Respýblıkasy Premer-Mınıstriniń orynbasary Imanǵalı Tasmaǵambetovtiń tóraǵalyǵymen Almaty qalasynda ótetin 2017 jylǵy 28-shi Dúnıejúzilik qysqy Ýnıversıadaǵa daıyndyq barysy jóninde keńes ótti, dep habarlaıdy QR Úkimetiniń baspasóz qyzmeti.
Qazaqstan Respýblıkasynyń sportshylary alǵash ret Ýnıversıada baǵdarlamasyna engen sporttyń barlyq túri boıynsha saıysqa túsedi.
Sonymen qatar, Qazaqstan tarapynan qatysatyn 250 sportshynyń tizimi jınaqtalyp, kelisildi. Olardyń barlyǵy jınaqtalyp, saıysqa ázir tur.
«Biz 28-shi Dúnıejúzilik qysqy Ýnıversıadaǵa daıyndyq barysy jónindegi máseleni, onyń ishinde stýdenttik komandalardyń oqý-jattyǵý jıynyn ótkizý qorytyndysyn, FISU konferentsııasyn uıymdastyrý jáne ulttyq qurama komandany paradtyq sport kıimderimen qamtamasyz etý máselelerin qarastyramyz», - dedi keńes barysynda Imanǵalı Tasmaǵambetov.
Ýnıversıadaǵa daıarlyq aıasynda 12 qysqy sport túrinen 26 oqý-jattyǵý jıyny uıymdastyryldy jáne ótkizildi. Onyń ishinde kerlıng, shaıbaly hokkeı, konkı tebý sporty, mánerlep syrǵanaý, short-trek, bıatlon, shańǵy jarysy, shańǵymen tramplınnen sekirý, taý shańǵysy, frıstaıl (akrobatıka), snoýbord jáne shańǵy qos saıysy bar. Oǵan 32 joǵary oqý orny men 5 kolledjden 137 sportshy qatysty.
Sondaı-aq, 2-5 aqpan kúnderi «Ýnıversıtettik sport: qoǵamnyń densaýlyǵy men bolashaǵy» taqyrybynda Ýnıversıada baǵdarlamasynyń resmı bóligi sanalatyn FISU qysqy konferentsııasy ótedi. Sharaǵa álemniń 30 elinen ulttyq stýdenttik federatsııalardyń prezıdentteri, JOO-nyń rektorlary, álemdik qaýymdastyqtaǵy jetekshi ǵalymdar men mamandar qatysady dep kútilýde.
Aıta keteıik, Ýnıversıadanyń basty mindeti - ýnıversıtetterde sportty damytý, jastar arasynda salaýatty ómir saltyn qalyptastyrý.
