Tasmaǵambetov eýropalyq bıznesmenderdi eýrazııalyq kólik dálizin paıdalanýǵa shaqyrdy
MÁSKEÝ. QazAqparat - Qazaqstan Respýblıkasynyń Reseı Federatsııasyndaǵy Tótenshe jáne ókiletti elshisi Imanǵalı Tasmaǵambetov eýropalyq bıznesmenderdi eýrazııalyq kólik dáliziniń múmkindigin paıdalanýǵa shaqyrdy, dep habarlaıdy Máskeýdegi QazAqparat tilshisi RF-daǵy QR Elshiliginiń baspasóz qyzmetine silteme jasap.
Habarlamada atalyp ótkendeı, Imanǵalı Tasmaǵambetov Reseı elindegi Germanııa Federatıvti Respýblıkasynyń uıymdastyrýymen ekonomıkalyq baǵytta órbigen "Eýropalyq keńes - Eýrazııalyq ekonomıkalyq odaq" atty pikirtalas alańyna qatysty.
Osy jıynda sóz sóılegen Elshi Eýrazııalyq ekonomıkalyq odaqtyń negizi qalanyp, onyń ári qaraı qarqyn alýy, eń aldymen, Qazaqstan Prezıdenti Nursultan Nazarbaevtyń arqasynda ekendigin erekshe atap ótti.
«Eýropalyq Odaq qalyptasqan úrdiske saı, Eýrazııalyq ekonomıkalyq odaqtyń saýda-sattyq salasy boıynsha negizgi seriktesine aınalǵan. EAEO elderi Eýropalyq odaq syrtqy saýda kóleminiń 50% astam úlesin ıelenýde», - dedi Imanǵalı Tasmaǵambetov.
Taýarlardy jetkizý kezinde onyń ózindik qunyna qaraǵanda tasymalyna ketetin ýaqyt shyǵynyn esepteý áldeqaıda mańyzdy. Osy rette, Elshi Eýropa men Azııany qosatyn, shóldi dalamen ótetin transeýrazııalyq joldyń sý qatynasynan artyq ekenin atap ótti.
«Qazaqstan buǵan tolyǵymen ázir. Elimizde memlekettik baǵdarlama tolyqtaı júzege asyp otyr. 26 jyldyń ishinde 10 myń shaqyrym jol jańartylyp, jóndeldi. Jýyrda 8000 shaqyrym tasjol paıdalanýǵa beriledi. Sonymen qatar, 2,5 myń shaqyrym temirjol iske qosyldy», - dedi Imanǵalı Tasmaǵambetov.
Pikirtalas alańynda «Eýrazııalyq ekonomıkalyq odaq - saýda sattyq saıasatynyń ustanymy» atty saraptamalyq jumys kópshilik nazaryna usynyldy. Onda kóptegen qajetti aqparattar men málimetter jıyntyǵy berilgen.
