Tasqynǵa – tosqaýyl: ShQO-da 94 eldi mekendi sý basý qaýpi bar
Ótkenge taldaý, bıylǵa jospar
ShQO Tótenshe jaǵdaılar departamenti ótken jyly kóktemgi sý tasqyny kezeńi qalaı ótkenin taldap, qaýipti ýchaskelerdi anyqtaǵan. Qutqarýshylardyń sózinshe, tizimde 22 613 adam turatyn 94 eldi mekendi sý basý qaýpi bar. Bul aýyldarda 7191 turǵyn úı ornalasqan.
- Qardyń erýine baılanysty sý basýy múmkin eldi mekenderge basty nazar aýdaryp otyrmyz. Taldaý kórsetkendeı, tasqyn qaýpiniń deńgeıi Óskemen qalasy, Altaı, Katonqaraǵaı, Tarbaǵataı, Glýbokoe, Shemonaıha, Kókpekti jáne Borodýlıha aýdandarynda joǵary bolyp otyr, - dedi oblystyq TJD bastyǵynyń orynbasary Dmıtrıı Tıtov.
ShQO Jumyldyrý daıyndyǵy basqarmasynyń basshysy Eldos Chıkenovtyń aıtýynsha, sý tasqynyna ákimdikter 87 myń dana ydys-qap, 15 myń tonna ınertti materıaldar, 373 tonna JJM ázirledi. Syıymdylyǵy 11800 adamdy quraıtyn 108 evakýatsııalyq pýnkt daıyndaldy.
- Jergilikti atqarýshy organdardyń bıýdjetterinde tótenshe jaǵdaılarǵa 1,9 mlrd teńge qarastyrylǵan. Búginde 366 myń tekshe metr qar shyǵaryldy, avtokólik joldaryndaǵy 2647 jáne temirjoldardaǵy 121 sý ótkizý qurylystary tazartyldy. Sondaı-aq 489 kópir, 514 aryq pen kanal tazartylǵan. 3 ret aerovızýaldy tekserý júrgizildi. Jol kartasy boıynsha 2021 jyly oblystyń 5 aýdanynda jalpy somasy 134 mln teńgege 10 shara iske asyrý josparlanýda. Máselen, naýryz aıynda Buqtyrma, Ertis, Kúrshim, Ýba ózenderinde muzdy jarý boıynsha aldyn alý jumystary kózdelip otyr, - dedi ol.
2412 tehnıka saqadaı saı
Óńirdiń barlyq qyzmetteriniń jumysyn kúsheıtý maqsatynda Shyǵys Qazaqstan oblysy ákiminiń ókimimen 1 aqpannan bastap aımaq aýmaǵynda joǵary daıyndyq rejımi engizildi. Jumys toptary jergilikti atqarýshy organdarǵa sý tasqyny kezeńine tekserý júrgizdi. Oblystyń sý basý múmkin ýchaskeleri jiti tekserildi. Tasqyn qaýpin azaıtý úshin bekitilgen is-sharalardy oryndaý boıynsha usynystar berilip, tıisti jumystar qolǵa alynǵan.
Shyǵys Qazaqstanda 2412 tehnıka, 370 motopompa bar. Qazirgi ýaqytta qutqarýshylar «Kóktem-2021» Respýblıkalyq komandalyq – shtabtyq oqýlaryn ótkizýge daıyndalyp jatyr. Ol búkil respýblıka boıynsha 4-5 naýryz kúnderi ótedi. Oqý-jattyǵý sheńberinde 103 elektrosırena iske qosylyp, teleradıo habarlardy taratý jolymen ortalyqtandyrylǵan habarlaý júıesi júzege asyrylady.
- Turǵyndarǵa aıtarym, úreıge berilýdiń qajeti joq. Eger biz óz aýlamyzdy, al PIK úı mańyndaǵy aýmaqtardy tazalasa, tyǵyryqtan shyǵýǵa bolady. Polıtsııa qar shyǵarý jumystaryn ýaqtyly istemegen uıymdarǵa qatysty tıisti sharalardy qoldanady. Bári oıdaǵydaı iske assa, sý basý qaýpi barynsha azaımaq. Sonymen qatar jer úı turǵyndary sý ótkizý qubyrlarynyń jaǵdaıyn baqylap, olardy tazalaýy qajet, - dep túsindirdi Dmıtrıı Tıtov.
«Qazgıdromet» RMK málimetine súıensek, oblys boıynsha jerdiń tońy 34 sm-den 150-ge deıin. Qar jamylǵysynyń bıiktigi – 3-ten 67 sm-ge deıin.
- Qazirgi ýaqytta gıdrologııalyq jaǵdaı turaqty. Ózenderdegi muz qalyńdyǵy 28-den 94 sm-ge deıin jetedi. Shaǵyn ózenderde muz qabatynyń buzylýy baıqalady, - deıdi mamandar.