Tasqynǵa daıyndyq: birneshe aýdannyń sý ótkizý qurylymdary tekserildi - SQO
SQO tótenshe jaǵdaılar departamenti baspasóz qyzmetiniń málimetinshe, aldaǵy sý tasqynyna daıyndyq aıasynda vedomstvo basshysynyń orynbasary Murat Qanǵajınov Aqqaıyń, Taıynsha, Shal aqyn, Ǵ. Músirepov, Aıyrtaý, M.Jumabaev, Tımırıazev jáne Esil aýdandarynda boldy. Jergilikti jerlerde tabıǵı qubylystyń halyqqa zardap ákelmeýine eń aldymen ákimdikter jaýapty. Kezdesýlerde aýdan aýmaǵynda sý tasqynynyń qaýipsiz ótýiniń ózekti máseleleri, jergilikti atqarýshy organdardyń, azamattyq qorǵaý qyzmetteri jáne qurylymdarynyń osyndaı qaýipti kezeńde tótenshe jaǵdaıdyń aldyn alýǵa daıyndyǵy talqylandy.
Sondaı-aq, Taıynsha aýdanynyń Shaǵalaly ózenindegi sý ótkizý qurylymdary, Aqqaıyń aýdanynyń Smırnovo, Rýblevka, Aralaǵash, Shal aqyn aýdanynyń Aqan Baraq jáne Gorodetskoe aýyldarynyń qorǵanysh úıindileri, Ǵ.Músirepov aýdanynyń Esil ózeni arqyly ótetin «Ekaterınbýrg-Almaty» M-36 respýblıkalyq mańyzy bar avtojolynyń 769 shaqyrymyndaǵy apattyq jaǵdaıda turǵan kópir tekserildi. Aýyr ınjenerlik tehnıkanyń ázirligi de nazardan tys qalmady.
«Oblysta jylda kóktemde tasqyn sý bolý qaýpi joǵary. Sol sebepti osy tabıǵı qubylysqa erte bastan daıyndalamyz. Tótenshe jaǵdaılar departamenti jáne jergilikti atqarýshy organdar jaǵdaıdy baqylaýda ustaıdy. Jalpy aýdandardyń sý tasqynyna daıyndyǵy tıisti deńgeıde júzege asyrylyp jatyr. Eldi mekenderden qar shyǵarylyp, ınertti materıaldar daıyndalýda. Ózenderde jarylys jumystaryn júrgizý úshin jáne ınjenerlik tehnıkany jalǵa alý úshin sharttar jasalyp jatyr», - dedi Murat Qanǵojınov.
