Tasqyn Japarqulov: Salyq amnıstııasy kásipkerlerge úlken demeý

JARKENT. QazAqparat - Áleýmet Elbasynyń ár jylǵy Joldaýynan eldi damytý jolynda jańa lep, jaqsy jańalyq kútetini jasyryn emes. Osyndaı úkili úmit kásipkerler úshin salyqtyq amnıstııa bolyp otyr. Bundaı pikirdi Almaty oblysy Panfılov aýdany Jaskent aýyldyq okrýgine qarasty «Ernar» jeke sharýa qojalyǵynyń basshysy Tasqyn Japarqulov bildirdi, dep habarlaıdy QazAqparat tilshisi.

Tasqyn Turǵanǵazyulynyń pikirinshe, bıylǵy Joldaý qarapaıym halyqtyń, shaǵyn bıznes ókilderiniń de kóńilinen shyǵady. Dál osy baǵytty memlekettik qoldaý jalpy jurtshylyqtyń turmys sapasyna áser etetini de sózsiz.

«Sondyqtan da bıylǵy Elbasy Joldaýyn asa mańyzdy áleýmettik baǵdarlanǵan qujat dep qabyldaýǵa bolady. Óıtkeni bunda áleýmettiń áleýetin arttyratyn jaıttar keńinen qamtylǵan. Máselen, Prezıdenttiń búldirshinderdiń mektepaldy bilim sapasyn arttyrýdy tapsyrýy, 2019 jyldy «Jastar jyly» dep jarııalaýy, muǵalimderdiń mártebesin ósirý týraly pikiri, eń tómengi jalaqy kólemin kóbeıtý, dárigerlik qyzmetti jaqsartý, jalpy, azamattardyń jaıly ómir súrýin qamtamasyz etý týraly naqty tapsyrmalary halyqtyń kóńilinen shyǵyp, jurtshylyqtyń qoldaýyna ıe boldy», - deıdi qojalyq basshysy.

Onyń aıtýynsha, Joldaýdyń kásipkerlikti qoldaýǵa baǵyttalǵan bóligi de kóńilden shyǵady.

«Dúnıejúzilik banktiń «Bıznes júrgizý jeńildigi» reıtıngisi boıynsha Qazaqstan 190 eldiń ishinde 36 orynǵa kóterildi. Bul bıznesti damytýǵa qatysty ókimettiń ustanymy durys ekenin bildirse kerek. Endi Elbasymyzdyń 2019 jylǵy 1 qańtardan bastap shaǵyn jáne orta bızneske «salyq amnıstııasyn» jarııalaýy - bul salada jarqyn isterdiń qanatyn keńinen jaıdyrady dep nyq senemiz», - deıdi Tasqyn Japarqulov.

Aıta keterligi, Tasqyn Japarqulov uzaq jyldardan beri júgeriniń elıtalyq tuqymyn ósirýmen shuǵyldanyp kele jatyr. Ol kezinde respýblıkalyq jer komıssııasynyń múshesi bolǵan. Birneshe ret Almaty oblystyq máslıhatynyń depýtattyǵyna saılanǵan. «Eren eńbegi úshin» jáne «Qazaqstan Respýblıkasynyń Táýelsizdigine - 20 jyl» merekelik medaliniń ıegeri. «Panfılov aýdanynyń Qurmetti azamaty».