Tasqyn sýdan zardap shekkenderge jan-jaqty kómek beriledi – Ómirzaq Shókeev
MAQTAARAL. QazAqparat – Maqtaaraldaǵy tótenshe jaǵdaı boıynsha kezekti shtab otyrysyn ótkizgen oblys ákimi Ómirzaq Shókeev sý basqan eldimekenderde halyqqa jan-jaqty kómek berip, qoldaý kórsetý kerektigin atap ótti. Aımaq basshysy halyqqa kórsetiletin kómektiń úlken aýqymda bolatynyn aıtyp, tıisti sala basshylaryna birqatar tapsyrma berdi, dep habarlaıdy QazAqparat tilshisi.
Óńir basshysy eń aldymen evakýatsııalyq oryndarǵa ornalasqan halyqqa áleýmettik kómek kórsetý jáne ótemaqy tóleý úshin olardyń mal sany men jyljymaıtyn múlik, jeke bas qujattarynyń málimetin jınaqtaýdy tapsyrdy. Sondaı-aq, apattan zardap shekken turǵyndardy azyq-túlik, qajetti zattarmen qamtamasyz etýge kásipkerler men qoǵamdyq qorlardy tartýdy usyndy.
«Úılerge kelgen zalaldyń mólsherin esepteýdi tapsyramyn. Kásipkerlik nysandarǵa kelgen zalal mólsherin anyqtaýdy mindetteımin. Zaqym kelgen avtomobıl joldary men turǵyn úı-kommýnaldyq ınfraqurylym obektilerine keltirilgen zııannyń mólsherin esepteýdi qolǵa alý qajet. Aýylsharýashylyǵy alqaptary men úı janýarlaryna keltirilgen zııannyń mólsherin eseptep, qaýip tónip turǵan eldimekenderdi tasqyn sýdan qorǵaý maqsatynda bóget turǵyzýdy qolǵa alý kerek», - dedi Ómirzaq Shókeev.
