Tasqyn sýdan keıin úıiniń irgetasy sógilgen aqtóbelik ákimdik jaǵalap júr
AQTÓBE. QazAqparat - Aqtóbedegi sý tasqynynan keıin 95 úı turýǵa jaramsyz bolyp qaldy. Іrgetasy sógilip, baǵalaýshylardyń sheshimimen úıi turýǵa jaramsyz dep tanylǵan aqtóbelik Aqtóle Óteshova bir aıdan beri ákimdik jaǵalap júr, dep habarlaıdy QazAqparat tilshisi.
Aqtóbe qalasyndaǵy sý tasqyny kezinde baspanasy qırap qalǵan adamdardyń basym bóligi úı salyp jatyr. Olarǵa Qýraıly, Órleý, Sazdy, Qyzyljar aýyldarynan jer berildi. Biraq aqtóbelik Aqtóle Óteshova bir aıdan beri ákimdik jaǵalap, basshylardyń jaýabyn ala almaı júr. Ol da ózgeler sııaqty jer alyp, qurylys materıaldaryna qajetti qarjyǵa qol jetkizgisi keledi. «Ózim «Aktıýbstroı-2» baý-baqsha ujymynda turamyn. Úıim sapaly kirpishten salynǵanymen sýǵa ketken soń irgetasy sógilip ketti. Baǵalaýshylar kelip, «turýǵa jaramsyz» degen qorytyndy shyǵaryp, sheshimniń bir danasyn ózime, ekinshisin qalalyq jer qatynastary bólimine berdi. Sý úıdiń shatyryna deıin jetti. Úıde 7 adam turamyz. Nemerem týa bitti júrek aýrýyna shaldyqqan. Qazir páter jaǵalap júrmiz»,- dedi Aqtóle Óteshova.
A. Óteshova eki aıdan beri 60 myń teńgege páter jaldap turady. Balalarynyń jumysy turaqsyz. 2011 jyly salǵan úıi jaramsyz kúıge túsken soń Óteshova aryzyn oblys ákimi Berdibek Saparbaevtyń qolyna ustatty.
«Jer qatynastary bóliminiń mamandary úıdi baryp qaraıdy. Aldyn-ala eshteńe aıta almaımyn. Baǵalaýshylar bizge qulaǵaly turǵan úılerdiń tizimin berip jatyr. Biz sol boıynsha jumys istep, jer berýdemiz. Bárin komıssııa sheshedi», - dedi qalalyq jer qatynastar bóliminiń basshysy Ushqyn Myńbaev.
