Tasqyn sýdan buzylǵan joldar jóndeldi - Qazaqavtojol
ASTANA. QazAqparat - «Qazaqavtojol» sý tasqyny saldarynan buzylǵan 40-tan astam avtojol ýchaskesin qaıta jóndedi. Bul týraly brıfıngte «Qazaqavtojol» RMK bas dırektory Ulan Álipov málim etti, dep habarlaıdy QazAqparat.
«Sý deńgeıniń kóterilýi bastalǵannan beri erigen qar sýynyń avtojol ústinen 96 ret asyp tógilýi tirkeldi. Sý tasqynynyń saldarynan 42 ýchaskede avtomobıl joldary men joldaǵy jasandy qurylystar buzylyp, zardap shekti. 2016 jylǵy jaǵdaımen salystyrǵanda, sýdyń joldan asyp tógilýi byltyrǵy kórsetkishten 3 ese, jolǵa jáne jasandy qurylystaryna zaqym keltirýi 2,5 ese asyp tústi. 41 avtojol ýchaskesi boıynsha sý tasqyny zardaptaryn qalpyna keltirý sharalary aıaqtaldy. 180 metr jol qabaty, 7,1 myń metr jol jıegi, 13 sý ótkizý qubyry qalpyna keltirildi», - dep atap ótti Álipov.
Sonymen birge ol «Keshendi maqsatty baǵdarlama» aıasyndaǵy eki aılyq jumystardyń baǵyttary atady.
Bul turǵyda shuńqyr jóndeý, joltabandar men jol taramdaryn joıý, jol belgilerin ornatý, jol qorshaýlaryn jóndeý, júrgin bólikti syzyp belgileý, avtopavılondar men demalys alańdaryn jóndeý jumystary júrgizilýde.
«Búgingi tańda barlyq jumys kestege sáıkes atqarylýda jáne bıylǵy jyldyń 15 maýsymyna deıin KMB josparynyń 60 paıyzyn oryndaýdy belgiledik», - dedi Ulan Álipov.
