Tasqyn sý Soltústik Qazaqstan oblysyn ábigerge salýy yqtımal - Qazgıdromet
ASTANA. QazAqparat - Qazgıdromet kóktem mezgilinde ózen arnalarynyń jáne tasqyn sýlardyń deńgeıin baqylaýda ustaýda. Bul týraly búgin Astanada ótken baspasóz máslıhatynda Gıdrologııa departamentiniń dırektory Dıdar Jánibekuly málim etti, dep habarlaıdy QazAqparat.
«Búgingi tańda Qaraǵandy oblysy men Aqmola oblysy boıynsha sý tasqynynyń joǵary deńgeıi artta qaldy, osyǵan baılanysty, ózenderdegi sý deńgeıi jaqyn aradaǵy 2-3 kúnde tómendeıdi dep kútilýde. Qazirgi ýaqytta Aqmola oblysynda tek Jabaı men Qalqutan ózenderinde qaýipti deńgeı saqtalyp otyr», - dep atap ótti ol.
Onyń sózinshe, qaýipti jaǵdaı Qostanaı oblysynda da saqtalyp otyr. Onda ózen sýlarynyń deńgeıi bir qalypty bolǵanmen, qar sýy dalaǵa jaıylyp ketip jatyr.
Qaraǵandy oblysyndaǵy Nura ózeninde sý deńgeıi túskenimen, qaýip Jamansarysý ózeninen shyǵýy yqtımal. Onyń ústine Maraqand sý qoımasynan aǵyzylǵan artyq sý Nura ózeni arqyly Aqmola oblysyna ketedi.
Aqtóbe oblysyna keletin bolsaq, onda sýdyń deńgeıi endi tómendeı beredi. Kerisinshe, Soltústik Qazaqstan oblysyndaǵy ózender deńgeıi kóteriledi dep kútilýde. Sebebi Aqmola oblysynan aǵyzylǵan sý Petropavlǵa bet alady. Sol kezde ózender arnasynan shyǵyp, birqatar qıyndyqtar týyndaýy múmkin», - deıdi D. Jánibekuly.
Sondaı-aq Ońtústik Qazaqstan, Jambyl men Almaty oblystaryndaǵy ózenderde sý deńgeıi artady.
