Tasqyn sý Saýran aýdanyndaǵy eldi mekenderge qaýip tóndirip tur

TÚRKІSTAN. QazAqparat - Túrkistan oblysynda sý tasqynyna baılanysty jedel jeli iske qosyldy, dep habarlaıdy QazAqparat tilshisi.

Eske sala keteıik, óńirdegi Kentaý, Túrkistan qalalarynda jáne Báıdibek, Saýran, Ordabasy aýdandarynda jaýyn-shashynnan kósheler men aýlalardy sý basyp jatyr.

Qazirgi kezde jergilikti atqarýshy organdar men tótenshe jaǵdaı bóliminiń qyzmetkerleri aýmaqtan sý arnasyn burý, shyǵarý jumysyn júrgizip jatyr.

Bul jumysqa Túrkistan oblysy tótenshe jaǵdaılar departamentinen 56 qyzmetker, 10 tehnıka, 20 motopompa jumyldyrylǵan.

Sonymen qatar, kóshelerdi, úılerdiń aýlasyn sý basý faktisine baılanysty TJD jedel jelisi iske qosylyp, turǵyndar tarapynan habarlama túsken jaǵdaıda shuǵyl is-sharalar atqarylýda.

«Búgin Túrkistan oblysynda taýly aımaqtarda qatty jaýyn-shashyn men qalyń qardyń erýine baılanysty ózen-kólde sý deńgeıi kóterildi, sodan keıin eńispen tómen qaraı sý tasqyny boldy. Sonyń saldarynan Kentaý, Túrkistan qalalarynda jáne Báıdibek, Ordabasy, Saýran aýdandarynda aýlalar men kóshelerdi sý alyp ketti. Qazir Kentaý men Báıdibektegi sýdyń deńgeıi tómen tústi. Tek Saýran aýdanynda ǵana tasqyn sý eldi mekenge qaýip tóndirip tur. Eń bastysy sý basqan úıler men zardap shekkender joq», - deıdi Túrkistan oblysy TJD basıtyǵynyń orynbasary Erik Sarybaev.

Aıta keteıik, budan aldyn Túrkistan oblysynda TJD kúsheıtilgen rejımge kóshkenin jazǵan bolatynbyz.