Tasqyn sý ortasynda qalǵan júkti áıel men balany aýyl ákimi beline arqan baılap alyp shyqty
TÚRKІSTAN. QazAqparat - Tasqyn sý ortasynda qalǵan júkti áıel men balany aýyl ákimi beline arqan baılap qaýipsiz jerge alyp shyqty, dep habarlaıdy QazAqparat tilshisi.
Oqıǵa búgin Báıdibek aýdanynda bolǵan. Shaıan-Myńbulaq oblystyq mańyzy bar avtojolmen kele jatqan «VAZ-2106» avtokóligi qyrdan aqqan aǵyn sýdyń áserinen joldan shyǵyp ketken. Avtokólik ishinde 39 jastaǵy er azamat jáne 33 jasar júkti áıel men 7 jasar bala bolǵan. Olar qoryqqanynan kólik ústine shyǵyp, kólikti panalaǵan.
Bul jaıynda túsirilgen vıdeo áleýmettik jelide de tarady. Onda adamdardy kólikpen birge sý aǵyzyp bara jatqanyn kórýge bolady. Jaǵada turǵandar qutqarýǵa árekettenip, kómek beredi. Keńes boıynsha olardyń biri sýǵa sekiredi. Alaıda ol birshama jerge aǵyp ketken.
«Keıin mashına ústindegi qalǵan áıel men balany Myńbulaq aýyldyq okrýginiń ákimi Ǵalymjan Ákimbaev beline arqan baılap sý ortasynan alyp shyqty. Qazir olar aýdandyq ortalyq aýrýhanaǵa jatqyzylǵan. Dárigerler baqylaýynda» - deıdi Báıdibek aýdany ákimdigi taratqan aqparatta.
Búgin, 2 aqpan kúni saǵat 08:00-den bastap taýly aýdandarda qar erip, jaýyn-shashynnyń kóp túsýine baılanysty sý deńgeıi kóterilgenin jazdyq. Saldarynan Kentaý jáne Túrkistan qalalarynda jáne Báıdibek, Ordabasy jáne Saýran aýdandarynda aýlalar men kósheler sý astynda qaldy.
Sondaı-aq tasqyn sý Saýran aýdanyndaǵy eldi mekenderge qaýip tóndirip turǵany habarlandy.
Túrkistan oblysynyń úsh aýdanynda 6 kósheni sý basqany aıtyldy.
Óńirde kóligimen tasqyn sý ortasynda qalyp qoıǵan turǵyndar qutqaryldy.
Saýran aýdanynda 7 balabaqsha jumysyn toqtatty.
Túrkistan oblysynyń ákimi tasqyn sý kirgen eldi meken turǵyndarymen kezdesti.
Kentaý qalasy men Saýran aýdanynda tótenshe jaǵdaı jarııalanýy múmkin.
