Tasqyn kezinde qaýip tóndirýi múmkin gıdrotehnıkalyq qurylystar anyqtaldy - Qaraǵandy oblysy

QARAǴANDY. QazAqparat - Qaraǵandy oblysynda kóktemgi sý tasqynyna daıyndyq jumystary júrgizilýde. Óńirde gıdroqurylystardy pasporttaý júrgizildi. Qajetti materıaldar qory jasaldy, dep habarlaıdy QazAqparat tilshisi.

Óńirde gıdrotehnıkalyq qurylystarǵa baratyn joldar qardan tazartylady. Ár obektige kásiporyn qyzmetkerleri bekitilgen. Joǵary daıyndyq rejimin engizý kezinde táýlik boıy kezekshilik uıymdastyrylady.

Sý tasqyny kezinde eldi mekender úshin qaýip tóndirýi múmkin gıdrotehnıkalyq qurylystar anyqtaldy. Olardyń sany shamamen 50 nysandy quraıdy.

«Oblystyq kommýnaldyq menshiktiń barlyq nysandarynda sý tasqynyna qarsy daıyndyq jumystary júrgizildi. Mamandar sý aǵyzýdy tereńdetip, keńeıtti, ózen arnalarynan qoqys shyǵardy. Sondaı-aq bógetterdiń jotalaryna topyraq tógilip, tegisteldi, sý ólshegish syzǵyshtar ornatyldy», - dep málim etti Qaraǵandy oblysynyń Tabıǵı resýrstar jáne tabıǵatty paıdalanýdy retteý basqarmasynan.

Sonymen qatar, Saran jáne Fedorov sý qoımalarynda rettegish shlıýzder jóndeldi. Bıylǵy jyly Topar jáne Tıhonovka apattyq gıdrotehnıkalyq qurylystaryna kúrdeli jóndeý jumystary bastalady. Sondaı-aq, olardy pasporttaý jáne deklaratsııalaý júrgiziletin bolady.

Ótken jyly Soqyr ózenin sanatsııalaý jumystary aıaqtaldy. 2020 jyly Sherýbaı-Nura jáne Topar ózenderin sanatsııalaý josparlanýda.