Tasqyn kezeńi bastalǵannan beri 265 nysandy sý basty - TJM
Atap aıtqanda, Aqtóbe, Batys Qazaqstan, Pavlodar, Qaraǵandy oblystarynda 185 turǵyn úı, 78 saıajaı men 2 áleýmettik nysandy erigen qar sýy basqan. Barlyq jerdegi sý sorǵytyldy, Aqtóbe oblysyndaǵy 15 saıajaı ǵana baqylaýda qalyp tur.
Osy oblystarda 1165 adam evakýatsııalandy. Onyń 676-sy ýaqytsha pýnktterge, 480-i týystarynda ornalastyrylsa, 9-y úılerine oraldy.
Qaraǵandy oblysynda respýblıkalyq mańyzy bar avtojoldardyń 6 ýchaskesinde, Qaraǵandy jáne Aqmola oblystarynda oblystyq mańyzy bar avtojoldardyń 6 ýchaskesinde, Batys Qazaqstan, Aqmola, Qaraǵandy jáne Qostanaı oblystarynda jergilikti mańyzy bar avtojoldardyń 18 ýchaskesinde jáne Aqtóbe oblysynda jergilikti mańyzy bar avtojol ýchaskesi - bir kópirde sý tasyp jatyr.
Aıta keteıik, buǵan deıin QR Indýstrııa jáne ınfraqurylymdyq damý mınıstri Qaıyrbek Óskenbaev sý basý qaýpi bar joldardy kezekshi brıgadalar jiti baqylap otyrǵanyn málim etti.
TJM aqparaty boıynsha, Aqmola, Aqtóbe, Batys Qazaqstan, Shyǵys Qazaqstan, Pavlodar, Túrkistan, Qaraǵandy oblystary jáne Nur-Sultan qalasynda jergilikti atqarýshy organdar men TJM kúshteri 1368 myń tekshe metr erigen qar sýyn sorǵytqan. Túrkistan oblysynan basqalarynyń aýmaǵynda ınertti materıaldary bar 68112 qap tóselgen. Sonymen qatar, Batys Qazaqstan oblysynda 250 sharshy metr ózen alqabynda muz kesildi.
Jumystarǵa TJM, ІІM, jergilikti atqarýshy organdardan, úkimettik emes uıymdardan 2402 adam, 798 tehnıka, 350 sý aıdaý jáne 18 júzý quraly jumyldyryldy.
Mańǵystaý jáne Atyraý oblysynyń qutqarýshylary Batys Qazaqstan oblysyndaǵy Tasqala aýdany men Oral qalasynda áli de qyzmet kórsetip jatyr.
5 sáýirde Aqmola oblysyndaǵy Jibek Joly jáne Qoıandy kentterinde, Shyǵys Qazaqstan oblysy Altaı aýdanyndaǵy Zýbovsk kentinde aldyn alý jumystary bastaldy.
Eske salsaq, QR Tótenshe jaǵdaılar mınıstrligi Qazaqstanda 340 eldi mekendi sý basý qaýpi joıylǵanyn aıtqan bolatyn.
