Tasqynnyń qaýipti kezeńi artta qaldy ma – mınıstr jaýaby

ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov eldegi tasqyn kezeńi qashan aıaqtalatynyn aıtty.

— Tasqyn kezeńine kelsek, Aqmola, Soltústik Qazaqstan, Shyǵys Qazaqstan oblystary qalyp tur. Basqasha aıtsaq, tasqynnyń ekinshi, úshinshi tolqyndary bolyp jatyr. Ózderińiz de kórip jatyrsyzdar, úlken bir qaýipti jaǵdaı bolyp jatqan joq. Biz ózimizdegi sý qoımalaryn rettep jatyrmyz. Osy aıtylǵan úsh óńirde de sý qoımalarynda bos syıymdylyq bar, — dedi mınıstr jýrnalıstiń suraǵyna jaýap bere otyryp.

Sondaı-aq, ol sáýir aıaqtalǵansha tasqyn qaýpi saqtalatynyn aıtty.

— Sondyqtan biz sonshalyq qaýip kórip turǵan joqpyz. Tasqynnyń qaýipti kezeńi ótti dep aıta almaımyz, biraq sáýir aıynyń aıaǵynda, 25-nen keıin ótti dep aıta alamyz, — dedi Nurjan Nurjigitov Astanada ótip jatqan Qazaqstannyń sý sektoryn damytý jónindegi úılestirý keńesi otyrysynyń kýlýarynda.

Osy jıynda Qazaqstannyń sý sharýashylyǵyn damytýǵa arnalǵan halyqaralyq qujattarǵa qol qoıyldy.