Tasqynnyń ekinshi tolqyny: ShQO aýmaǵynyń jartysyna jýyǵynda áli qar jatyr
ASTANA. KAZINFORM — Shyǵys Qazaqstan oblysynda sý tasqynynyń ekinshi tolqyny bastaldy. Bul týraly ShQO TJD tótenshe jaǵdaılardyń aldyn alý basqarmasynyń aǵa ınjeneri Aıaýlym Kekıeva aıtty.
«Qazirgi ýaqytta Shyǵys Qazaqstan oblysynyń aımaqtarynda jáne taýlardyń ońtústik betkeılerinde qar jamylǵysynyń erýi bastaldy. ıAǵnı, oblysta sý tasqynynyń ekinshi tolqyny bastaldy dep boljanady. Oblystyń soltústik, soltústik-shyǵys jáne shyǵys aýdandarynda, atap aıtqanda, Rıdder qalasynda, Altaı, Samar, Marqakól, Glýbokoe, Katonqaraǵaı, Kúrshim, Shemonaıha aýdandarynda sý tasqyny qaýpi týyndaýy múmkin», — dedi ol ortalyq kommýnıkatsııalar qyzmetindegi brıfıngte.
Onyń dereginshe, oblys aýmaǵynyń 44 paıyzy qar jamylyp jatyr. Kóptegen aýdandarda qar qory jáne ondaǵy sýdyń mólsheri normadan 1,5-2 ese joǵary.
«Barlyq gıdrotehnıkalyq qurylystar shtattyq rejımde jumys isteýde. Sý tasqyny jaǵdaıyn ýaqytyly baǵalaý úshin turaqty túrde aerovızýaldyq tekserýler júrgiziledi. Mobıldi toptar kún saıyn táýlik boıy monıtorıng júrgizedi. Jaǵalaýdy nyǵaıtý jáne ózenderdiń túbin tereńdetý, bóget salý, qapshyq tóseý jumystary qolǵa alynǵan. Jergilikti atqarýshy organdar arnalardy, aryqtar men kópirlerdi tazartý boıynsha josparlanǵan jumysty tolyq kólemde aıaqtady. Oblysta jedel shtab jumys istep tur. Barlyq qyzmetterdiń jumysy úılestirilgen. Kúsh-quraldar ázir», — dedi Aıaýlym Kekıeva.
