Tasqynnan japa shekken aqtóbelikterge qoǵamdyq qor arqyly kómek berilip jatyr

AQTÓBE. KAZINFORM — Aqtóbede «Qamqor — Aqtóbe 2024» qoǵamdyq qory sý tasqyny kezinde zardap shekken, alaıda múlkiniń qujaty joq adamdarǵa kómek kórsete bastady. Búginge deıin olarǵa 49 mln teńge aýdaryldy.

Bıyl sáýir aıynda jumysyn bastaǵan qorǵa búginge deıin 800 mln teńgege jýyq qarjy jınaldy.

Qorǵa óńirdegi iri kompanııalarmen qatar memlekettik mekeme qyzmetkerleri bir kúndik jalaqysyn aýdardy. Sonymen birge qarapaıym aqtóbelikter de aqsha berdi.

Qazirgi kezde qor alǵashqy otyrysyn ótkizip, sý tasqyny kezinde zardap shekken turǵyndarǵa qarjylaı kómek kórsetilip jatyr. 

— Qorǵa 800 mln teńgege jýyq qarjy tústi. Qazirgi kezde 10-nan astam adamǵa 49 mln teńge aýdaryldy. Munda baý-baqsha ujymdarynda turatyn, úıine sý kirgen, alaıda qujaty joq nemese túgel emes adamdardyń ótinishi túsedi. Aqtóbe qalasy Astana aýdany boıynsha bir otbasyna kómek kórsetildi. Al Almaty aýdany boıynsha 10-nan astam adamnyń ótinishi qanaǵattandyryldy. Keıbiri sý tasqyny kezinde zardap shektim dep aıtqanymen, teksergende ol úıde múlde turmaǵan, ózge baspanasy bar bolyp shyqty. Onyń ótinishi qanaǵattandyrylmady, — deıdi «Qamqor — Aqtóbe 2024» qoǵamdyq qorynyń múshesi Jańalyq Ahash.

Aıta keteıik, Aqtóbe oblysy boıynsha kóktemgi sý tasqyny kezinde 4700-ge jýyq úıge sý kirdi.

Onyń 3 myńnan astamy saıajaıda ornalasqan.

Qazirgi kezde Yrǵyz aýdanynda tasqynǵa qarsy kúres jumystary jalǵasyp jatyr.

Mundy Quılys jáne Jaısańbaı aýyldaryndaǵy bógetti bekitý jumystaryna tótenshe jaǵdaılar qyzmeti men áskerıler, aýyl turǵyndary jumyldyrylǵan.