Tasqynnan japa shekken 6 óńirde qansha úı salynyp, neshe mektep jóndeldi

ASTANA. KAZINFORM — Vıtse-premer turǵyn úı qoryn, áleýmettik nysandardy, jol jáne ınjenerlik ınfraqurylymdy, elektr energetıka, baılanys, shaǵyn jáne orta bıznes nysandaryn qalpyna keltirý máseleleri boıynsha keńes ótkizdi. 

Keńeske beıindi mınıstrlikterdiń ókilderi, Aqmola, Aqtóbe, Atyraý, Batys Qazaqstan jáne Soltústik Qazaqstan oblystarynyń ákimderi qatysty.

Aqmola oblysynda búgingi tańda 273 turǵyn úı qurylysy júrip jatyr. Atbasar qalasynda kóppáterli úıler salynýda, onda qazan aıynda 165 otbasy qonystanýdy josparlap otyr.

Budan bólek, sý tasqynynan zardap shekken úsh aýdanda 108 jeke úı salynyp jatyr. 143 otbasy úshin turǵyn úı satyp alyndy. Resimdeý satysynda taǵy 45 páter bar. Oblysta eki mektep pen balabaqsha qalpyna keltirilýde.

Aqtóbe oblysynda barlyq zardap shekken úılerge baǵalaý júrgizildi, 1840 úı boıynsha zalal óteldi. 250 úı satyp alyndy, taǵy 88-i bir apta ishinde satyp alynady. Óńirde 22 áleýmettik nysandy qalpyna keltirý qajet.

Eki mektep pen úsh balabaqsha qurylysy júrgizilýde. Jol ınfraqurylymy men kópirler qalpyna keltirilýde. Aldaǵy ýaqytta 76 ShOB sýbektisine kómek kórsetý qajet.

Atyraý oblysynda zardap shekken 2663 úıdiń 2599-y boıynsha zalaldy óteýge sharttar jasalǵan. 69 ShOB sýbektisine kómek kórsetildi.

Zardap shekken malǵa keltirilgen zalal tolyǵymen óteldi. Injenerlik ınfraqurylym boıynsha problemalar joıyldy, joldar jóndelýde, úsh mektep qalpyna keltirilýde, taǵy bir mektep qaıta salynady.

Batys Qazaqstan oblysynda 13 áleýmettik nysan jóndelýde. Joldar men kópirler qalpyna keltirilýde. 570 saıajaı úıin zertteý jalǵasýda.

Qostanaı oblysynda barlyǵy 468 úı jóndeýge jatpaıdy. 153 jańa úı salynýda, qalǵan zardap shekkenderge bir apta ishinde turǵyn úı satyp alynady.

Arqalyq qalasynda 50 páterli úı salynýda. Osylaısha, turǵyn úı qory boıynsha barlyq jumystar 1 qyrkúıekke deıin aıaqtalady. Injenerlik jáne jol ınfraqurylymy jóndelýde, aınalma bóget salynýda.

Soltústik Qazaqstan oblysynda sý tasqynynan 165 ShOB sýbektisi zardap shekti, zalaldy óteýge ótinimder qabyldanýda. 620 úıdiń qurylysy bastaldy.

100 úı berilip, 391 otbasyǵa páter satyp alyp bergen. Petropavldaǵy joldar men sorǵy stantsııanyń jóndeýi bastaldy.

Esepterdi tyńdap, Qanat Bozymbaev sý tasqyny saldaryn joıý qarqynyn báseńdetpeýdi tapsyrdy.

Aqtóbe, Atyraý jáne Batys Qazaqstan oblystarynyń ákimderine vıtse-premer zardap shekkenderge turǵyn úı tapsyrý merzimin buzbaý jóninde eske saldy. 

Mektepter men balabaqshalardy oqý jylynyń basynda paıdalanýǵa berý de erekshe baqylaýda.

Ákimdikter qalpyna keltirý qarqyny boıynsha esepterdi kúndelikti negizde tapsyrýy tıis.