Tasqynnan zardap shekkenderge 5767 páter satyp alynǵan

ASTANA. KAZINFORM – Premer-mınıstrdiń orynbasary Qanat Bozymbaev Úkimet otyrysynda tasqyn saldarynan jalǵyz baspanasynan aıyrylǵan halyqqa qandaı kómek kórsetilgenin baıandady.

«Jalǵyz baspana bolyp eseptelgen 17,6 myńǵa jýyq úı men saıajaı qurylystary sý astynda qaldy. Táýelsiz baǵalaý kompanııalary men komıssııalardyń júrgizgen zertteýi negizinde 9156 úıdi jóndeýge bolatynyn anyqtap, al 8447 úı apatty dep tanyldy.

Jalǵyz baspanasy apatty bolyp tanylǵan turǵyn úı ıelerine kómek kórsetý úshin, Memleket basshysy olarǵa jańa turǵyn úı berý týraly sheshim qabyldady.

Bul aýqymdy jumys buryn-sońdy bolmaǵan qysqa merzimde júrgizildi. 3,5 aıda tıptik jobalar boıynsha 2576 úı salyndy jáne qaıtalama naryqta 5767 úı men páter satyp alyndy. Sonymen qatar, 9156 úı jóndeldi», - dedi vıtse-premer.

Qanat Bozymbaev bul jumystar Atyraý, Aqtóbe, Qostanaı jáne Soltústik Qazaqstan oblystarynda tolyq aıaqtalǵanyn atap ótti.

«Búgingi tańda Aqmola oblysynda 38 úı, Batys Qazaqstan oblysynda 28 úıdiń qurylysy aıaqtalýda. Aıaqtaý merzimi birinshi qazan.

Sondaı-aq, Batys Qazaqstan oblysynda Syrym aýdanynda jerasty sýy qaıta kóterilýi saldarynan 38 samannan salynǵan úıler apatty jaǵdaıǵa ushyrady. Bul fakt tamyz aıynyń sońynda anyqtaldy. Osyǵan baılanysty janadan úı salý sheshim qabyldandy. Qurylystyń aıaqtalý merzimi - 15 qazan.

Osy oblystardyń ákimderine kórsetilgen merzimderde qurylysty aıaqtaý týraly tıisti tapsyrma berýdi suraımyn», - dedi Qanat Bozymbaev.