Tasqynnan zardap shekkenderdiń múgedektik merzimi avtomatty túrde uzartylady
ASTANA. KAZINFORM – Eńbek jáne halyqty áleýmettik qorǵaý mınıstrliginiń resmı ókili Madııar Ýaqpaev tótenshe jaǵdaı rejımi jarııalanǵan aýdandar men qalalardaǵy ataýly áleýmettik kómek alýshylardyń áleýmettik mártebesi avtomatty túrde uzartylatynyn aıtty.
«Tótenshe jaǵdaı rejımi jarııalanǵan aýdandar men qalalardaǵy ataýly áleýmettik kómek alýshylarǵa memlekettik oryndarǵa júginbeı osy jyldyń ekinshi toqsanynda avtomatty túrde uzartylady. Kómek kórsetýge alǵash ret ótinish bildiretin azamattar elektrondy úkimet portaly arqyly júgine alady. Tótenshe jaǵdaı rejımi jarııalanǵan aýdandar men qalalarda turatyn múgedektigi bar azamattarǵa 2024 jylǵy II toqsanda qaıta kýálandyrýǵa tıis kelesi qyzmetter tótenshe jaǵdaı rejımi aıaqtalǵanǵa deıin avtomatty túrde uzartylady: múgedektik merzimi, jalpy eńbekke qabiletinen aıyrylý dárejesi, kásiptik eńbekke qabiletinen aıyrylý dárejesi jáne ońaltýdyń jeke baǵdarlamalary. Bul rette tótenshe jaǵdaı rejıminiń áreket etý merzimi aıaqtalǵan aı da tolyq esepteledi. Memlekettik járdemaqy tóleý buryn belgilengen múgedektik toby boıynsha júzege asady», - dedi resmı ókil.
Madııar Ýaqpaevtyń sózinshe, bul sharalar áleýmettik kómek alýshy otbasylar men múgedektigi bar azamattarǵa memlekettik qoldaýdy ýaqtyly kórsetýge múmkindik beredi.
«Múgedektigi bar azamattar birinshi kezektegi tártippen sanatorıılik-kýrorttyq emdeýmen jáne tehnıkalyq quraldar bolmaǵan nemese sý basý kezinde zaqymdanǵan jaǵdaıda qamtamasyz etiledi», - dedi ol.
