Tasqynnan zardap shekkender jańa baspanasyna tolyqtaı qonystanady – Premer-Mınıstr
ASTANA. KAZINFORM – Sý tasqynynan keıin turǵyn úı qurylysy men qalpyna keltirý is-sharalaryna 251 mlrd teńge baǵyttaldy. Bul týraly búgin Parlament palatalarynyń birlesken otyrysynda Úkimet basshysy Oljas Bektenov aıtty.
Bıylǵy sý tasqyny eleýli shyǵyn keltirgenine toqtalǵan Premer-Mınıstr: «Ózderiniń turǵyn úılerinen 120 myńnan astam adam qaýipsiz jerge kóshirildi. 67 570 adam ózderiniń úılerine oraldy. Qazir 3 952 adam evakýatsııalyq pýnkterde qalyp otyr. Jalpy, 12 myń jeke turǵyn úıdi, 26 myń saıajaı ýchaskesin sý basty. 98 úıdi áli de sý basyp tur», - dedi.
Onyń aıtýynsha, sý tasqynynan zardap shekken óńirlerdi qoldaý baǵytynda aýqymdy jumystar atqarylyp jatyr. 33 141 otbasy 100 AEK mólsherinde ótemaqy aldy. Bul turǵyda bıýdjetten 12 mlrd teńgeden astam qarajat bólindi.
«Baǵalaý boıynsha úılerdiń jartysyna jýyǵyn jóndeý men qalpyna keltirýdi qajet etedi. Jóndeýge qatysty ótemaqyny 5 823 otbasy aldy. 8 myń astam úı apatty dep tanyldy. Apatty bolǵan úıler boıynsha shyǵyndy óteýdiń eki nusqasy bar. Birinshiden, qaıtalama naryqta páter nemese jeke turǵyn úı satyp alý eskerilgen. Bul óz kezeginde jedel tártipte osy problemany sheship, otbasylarǵa baspana berýge múmkindik jasaıdy. Alaıda keıbir adamdar bul usynysqa kelispeı jatyr, ıaǵnı jańa baspana salyp berýdi surady. Qazir 3 155 otbasy baspanasyn alyp úlgerdi. Sonymen qatar, ár óńirde 2 049 úıdiń qurylysy júrip jatyr. Jalpy, turǵyn úı qurylysy men qalpyna keltirý is-sharalaryna 251 mlrd teńge baǵyttaldy. Bul qarajat qaıyrymdylyq kómek pen bıýdjet qarjysy esebinen quraldy», - dedi O. Bektenov.
Sonymen qatar ol tasqyn kezinde energııa júıesiniń 2 300-den astam baǵany jaramsyz dep tanylǵanyn aıtty. Elektr energııasynyń 54 shaqyrym jelisi úzilgen. Qazir onyń 40 paıyzy qalpyna keltirilgen.
«Joldardyń jaǵdaıyna toqtalsaq, sý tasqyny kezinde respýblıkalyq ári jergilikti mańyzdaǵy 290 ýchaskede kólik qozǵalysy shekteldi. Qazir Atyraý oblysyndaǵy bir ýchaskeden basqa barlyq jolda qozǵalys qalpyna keltirildi. Atalǵan bir ýchaskede sý tartylǵannan keıin, qozǵalys jandanady», - dedi Úkimet basshysy.
Onyń sózine qaraǵanda, bıyl kóktemde 39 bilim berý nysanyn sý basty. Sonyń arasynda 18-ine aǵymdaǵy jóndeý, 11-ine kúrdeli jóndeý jasalady. Al 9 nysan jaramsyz dep tanylyp, jańadan salynady. Taǵy bir bilim berý nysanyna qatysty zertteý júrip jatyr.
«Memleket basshysynyń tapsyrmasy boıynsha kún sýytqansha atalǵan óńirlerdegi adamdar jańa baspanalaryna tolyqtaı qonystanady, sondaı-aq ınfraqurylym nysandary qalpyna keltiriledi», - dedi Premer-Mınıstr.
