Tasqynnan zardap shekken otbasylar jylan jylyn jańa úıde qarsy alady
AQTÓBE. KAZINFORM — Qobda aýdanynda bıyl 147 úı salyndy. Onyń 130-y aýdan ortalyǵynda boı kóterdi. Kazinform tilshisi kóktem men jazda ár jerdi panalap, kúzde jańa úıge qonystanǵan, qıyndyqqa moıymaǵan turǵyndarmen kezdesip, Jańa jyl qarsańyndaǵy kóńil-kúıin bilip qaıtty.
Qobdada úı salynyp, bógetter bekidi
Kóktemgi tasqyn kezinde Qobda aýdanynda 288 úı sýǵa ketip, onyń 155-i jaramsyz dep tanyldy. Sol 155 úı ıesiniń 8-i baspanany satyp alsa, ózgesine salyndy.
Qurylys jumystaryna qaıyrymdylyq qorynan qarjy bólindi. Al qurylysty 15 merdiger júrgizdi. Qalǵan úı ıeleri jóndeý jumystaryn júrgizip aldy.
Qobda aýdanynyń turǵyndary jańa shaǵynaýdandy «Sıtı» dep atap ketken. Munda byltyr 24 úı, bıyl 130 úı salyndy. Úılerdiń aýdany — 80-100 sharshy metr.
Kóshege asfalt tóseldi, jaryqtandyryldy. Úılerdiń sýy, jaryǵy, gazy bar. Turǵyndar qajetinshi aýlasyna garaj, qora salyp, mal ustaı alady.
Bul aýdanda uzyndyǵy 1,7 shaqyrymdyq «Batys» bógeti, 4,9 shaqyrymdyq «Oral-Oıyl» bógeti, 2,7 shaqyrymdyq «Sýqaıyń» bógetiniń qurylysy júrdi. Qyzyljar, Qanaı, Jaryq aýyldary mańyndaǵy bógetter jóndeldi.
Eshnárse kedergi bolyp, toqtap qalǵan joq — Elmıra Bekjanova
Qobda aýdanynda jańa úıge kóshkenderdiń biri — Nurbol Madethan men Elmıra Bekjanovanyń otbasy. Kópbalaly otbasynyń úlkeni 14 jasta bolsa, kishkentaıy 11 aılyq.
Búginde balalardyń óz bólmesi bar, otbasynyń qonaq kútetin keń zaly bólek jabdyqtalǵan. Munda ótkendi anda-sanda eske alǵanymen, búginine shúkir etedi.
— Biz buǵan deıin Almatynyń Úsharal qalasynda turdyq. Ol kezde joldasym áskerı qyzmetshi boldy. 2013 jyldyń qarasha aıynda Qobda aýdanyna kóship keldik. Sebebi joldasym osy aýdanynyń týmasy. Ózim bıologııa páni muǵalimimin. Joldasym áskerı qyzmette bolǵanymen qazir alǵashqy áskerı daıyndyq páninen dáris beredi. Ol I.Taımanov atyndaǵy mektep-gımnazııaǵa, ózim Qobda kópsalaly kolledjine ornalastym. «Dıplommen aýylǵa» baǵdarlamasy aıasynda tómen paıyzben nesıe berip, úı aldyq. Úıimiz Biltabanov kóshesinde ornalasqan. Bul úıde biz 10 jyl turdyq. 2014 jyly alyp, sol jerde 4 balamyz dúnıege keldi. Al úlken qyzymyz Almaty oblysy Úsharal qalasynda dúnıe esigin ashqan edi. Biltabanov kóshesi óte jaıly boldy. Sol jerlerde úlkenderimiz, ata-ájelerimiz qoldaý kórsetti. Óte ystyq. Apat aıtyp kelmeıdi. 2023 jyly sý aýlaǵa kelgenimen, úıimizge kirmedi. 2024 jyly naýryz aıynda sý shaıyp ótti, — deıdi Elmıra Bekjanova.
Kóktemde kún kúrt jylynyp, ózen sýy kóterilgen kezde turǵyndarǵa aldyn ala habar berildi. Tótenshe jaǵdaılar qyzmeti eskertip, qaýipsiz jerge shyǵýdy surady.
Bul otbasy sol kezde qujattaryn alyp, kerek-jaraǵyn jınady, sý tımeıtin jerge kóterdi. Alaıda bárin birdeı saqtap qalý múmkin bolmady. Jıhazdary búgindi, múlki qırady.
— Joldasym salǵan qora birinshi qulady. Sodan keıin jazǵy saraı, garaj qulaı bastady. Sý úıge de kirdi. Óte qıyn jaǵdaı. Erteńine úıdiń jaǵdaıy qalaı ekenin kórýge bardyq… Qıyn… Biraq shúkir, shúkirshilik aıtamyn. Dalada qalmadyq, Úkimet tarapynan da, ákimdik te kelip, jaǵdaıymyzdy surady. Halyqtan kómek kóp boldy. Kezekte turǵan kezde de kópbalaly dep keıde alǵa jiberdi. Ol kezde kishkentaı balam 3 aılyq boldy. Qazir baspanaly boldyq. Іshi jyly, keń. Neshe jyl jınasaq ta mundaı úlken úı salyp ala almas edik. Rahmet aıtamyn, — dedi Elmıra Bekjanova.
Bul otbasy úıi sýǵa ketken kezde bir týǵanyn panalady. Olar da qıyn sátte qolushyn sozyp, kómek kórsetti. Sonymen birge el ishinde qaıyrymdy jandardan jetken kómekti aldy.
— «Kezekke baryp turyńdar, tamaq alyńdar» dep aıtady. Joldasym jumysta boldy, ózim kópbalaly ana retinde járdemaqy alyp otyrmyn. Sol kezde bizden de qıyn otbasylar boldy. Solarǵa jetsin dep barmaı júrgen kezder kezdesti. Degenmen biz de janashyr jandardyń yqylasyn kórdik. Qazirgi jaǵdaıymyz shúkir. Qımaıtynyń ras. Uldarym sol jaqqa baryp oınap keledi. Demalys kúnderi aparyp tastaımyz, dostarymen jolyǵady. Myna jaqta da balalar oıyn alańy salyndy. Jazda balalarmen tanysyp, dos tabady dep oılaımyn. Qazir shaǵyn aýdan sııaqty bolyp qaldyq. «Sıtı» dep ataıdy. Jaǵdaıymyz jaqsy. Ótken ómirge eshqandaı ókpe-renish joq, — dedi Elmıra Bekjanova.
Úı ishin óz talǵamymyzǵa saı jóndep aldyq — Tájmaǵambetovter otbasy
Tájmaǵambetovter otbasy da sońǵy jyldary kóktem saıyn úreıde otyrdy. Byltyr, bıyl sý tasqynynan zardap shekti.
2023 jyly úıi jóndeýge jaramdy bolsa, bıyl múlde iske aspaı qalǵan. Otbasy alǵashynda týma-týystaryn jaǵalady. Keıin aýdan ákimdigi 9 janǵa bir úıdi jalǵa alyp berdi.
— 2023 jyly úıge sý kirdi. Ol kezde kúrdeli jóndeý jumystaryna dep qarjy bóldi. Bıyl úı qulady. Jańa úı salynǵansha aýdanda ózge úıdi jalǵa alyp berdi. Bárimiz sonda turdyq. Al jańa úıge qyrkúıek aıynda kirdik. Búginde ótken kúnderdiń bárin umyttyq. Bári artta qaldy. Endi osy úıde nemerelerim ósse deımin, — dedi zeınetker Madına Pralına.
Úıde qos qarııa, balasy men kelini, nemereleri turady. Nemereniń úlkeni qazir stýdent.
Zeınetker Madına Pralına kishkentaıynan baýyryna basqan nemeresinen bir eli qalmaı, Aqtóbe qalasyna ere keldi. Stýdenttiń bar jaǵdaıyn jasap, as-sýyn ázirlep otyrady.
Al demalys kúnderi Qobdadaǵy úıine oralady.
— Úıimiz sý jaǵasynda ornalasqan soń jaǵdaıdy kózben kórip turdyq. Sol kezde «daıyndalyp otyryńdar» dep eskertti. Daıyndyq júrgizdik. Degenmen sý biz oılaǵannan buryn kelip qaldy. Evakýatsııa jumystary júrip, biz kóshtik. Al er adamdar úıge qondy. Maldy qaýipsiz jerge aıdap, úıdegi zattardy kóterip sharshaǵan soń túnde uıyqtap ketken. Bir kezde joldasym Samat sýdyń syldyryn estıdi. Turǵan sátte aıaǵyn sýda tur. Sodan maǵan habar berip, men tótenshe jaǵdaılar qyzmetine aıttym. Olar tereze arqyly qaıyqpen shyqty, — dedi Nasıma Jaqsylyqova.
Bul otbasyna № 752 úı berildi. Jerebe arqyly tańdaý túskende úıdiń shatyry endi jabyla bastaǵan. Qurylysshylarmen eki arada kelisim júrip, úı ıesi ishki árleý jumystaryna ózi kiristi.
— Kúıeýim — qurylysshy. Sondyqtan eki jumys bolmasyn dep árleýdi óz mindetine aldy. Aqysyn alyp, qajetti qurylys materıaldaryna jumsady. Jańa úıdiń aty — jańa úı. Qazir bala-shaǵamyz da, ózimiz de rızamyz, — dedi Nasıma Jaqsylyqova.
Aıta keteıik, Aqtóbe oblysy boıynsha sý tasqyny kezinde 4 myńǵa jýyq úı zardap shekti. Onyń 1 myńnan astamy apatty dep tanyldy.
Jeke kompanııalar esebinen 25 mlrd teńgege 500 úı salynyp, 513 daıyn úı satyp alyndy.
Sondaı-aq 3 myń turǵyn úıdi jóndeýge jáne qalpyna keltirýge 9,8 mlrd teńge bólindi.
Sý tasqyny kezinde Aqtóbe oblysynda 15 bóget buzyldy. Qazir onyń 9-ynda jóndeý jumysy aıaqtaldy.
Aqtóbe oblysynda kásipkerlermen birge sharýalar shyǵyny esepteldi. Kásipkerler shyǵyny ótelse, sharýalar ótemaqyny keler jyly alady.