Tasqynnan zardap shekken óńirlerdegi balalar jazǵy demalysqa joldama aldy
ASTANA. KAZINFORM – 27 maýsymda «Týǵan elge saıahat» jazǵy tanymdyq-týrıstik poıyzy jolǵa shyǵady. 12 kún ishinde balalar Astana, Býrabaı, Almaty, Taraz, Túrkistan, Baıqońyr aımaqtaryndaǵy tanymal mádenı-tarıhı oryndarǵa barady.
«Samruk-Kazyna Trust» qorynyń qoldaýymen júzege asyrylatyn áleýmettik joba eki maýsymda ótip, ár kezeńde 10-15 jas aralyǵyndaǵy 200 baladan qamtıtyn bolady.
«Balalar saıahat poıyzyndaǵy sapardan kókjıegi keńeıip, jańa dostar tabady, kelesi oqý jylyna kúsh-qýat jınap qaıtady degen senimdemiz. Onyń ústine bıyl sý basqan aımaqtarǵa basymdyq berip otyrmyz. Qandaı jaǵdaı bolmasyn, bizdiń mindet – baqytty balalyq shaqty qamtamasyz etý», - deıdi «Samruk-Kazyna Trust» áleýmettik jobalardy damytý qorynyń bas dırektory Alfııa Adıeva.
Bıyl sý tasqyny bolǵan óńirlerge basymdyq berilip, Atyraý, Soltústik Qazaqstan, Batys Qazaqstan, Aqtóbe, Qostanaı, Aqmola, Qaraǵandy jáne Ulytaý oblystary boıynsha kópbalaly jáne turmysy tómen, tolyq emes otbasylardaǵy 200 bala qamtylady.
Sondaı-aq, Qordaǵy kompanııalar tobynyń shalǵaı aýdandardaǵy enshiles kásiporyndary óndiristik kásip qyzmetkerleriniń kópbalaly jáne turmysy tómen, tolyq emes otbasylarda tárbıelenip jatqan 200 balasy jobaǵa qatysady. Barlyǵy 400 bala Qordyń portfeldik kompanııalary jáne tasqyn sýdan zardap shekken óńirlerdegi ákimdikter usynǵan tizimder boıynsha elimizdiń kórikti jerlerine saıahattaıdy. Saıahattaǵy demalystan basqa, jol boıy mektep oqýshylarymen tálimgerler men pedagogter jumys istep, qyzyǵýshylyqtary boıynsha úıirmeler, zııatkerlik jáne sporttyq oıyndar uıymdastyrylady.
Ekinshi maýsym 24 shildede bastalyp, jas saıahatshylar birinshi kezeńdegideı baǵdarda Qazaqstandy aralap, oı-órisin uzartady, jazǵy kanıkýlyn áserli de paıdaly ótkizýge múmkindik alady.
