Tasqynnan zalal kelgen egin shyǵyny qalaı óteledi
ASTANA. KAZINFORM – Aýyl sharýashylyǵy salasyndaǵy jeke jáne zańdy tulǵalarǵa tabıǵı sıpattaǵy tótenshe jaǵdaı saldarynan keltirilgen zalaldy óteý qaǵıdalary jarııalandy.
Tabıǵı sıpattaǵy tótenshe jaǵdaı jarııalanǵan kezde onyń shyǵyndaryn anyqtaıtyn jergilikti deńgeıdegi komıssııa qurylady. Oǵan jergilikti ákimdikterdiń, prokýratýra organdarynyń (kelisý boıynsha), sybaılas jemqorlyqqa qarsy is-qımyl organdarynyń (kelisý boıynsha), qoǵamdyq uıymdardyń, «Atameken» óńirlik kásipkerler palatasynyń, agroónerkásiptik keshen salasyndaǵy jeke kásipkerlik sýbektileri birlestikteriniń ókilderi kiredi. Komıssııa músheleriniń jalpy sany taq bolýy kerek jáne jeti adamnan aspaýǵa tıis.
Komıssııalar zalaldy óteý týraly ótinishterdi tótenshe jaǵdaı jarııalanǵan sátten bastap kúntizbelik 30 kún ishinde qabyldaıdy. Ótinishti elektrondy nysanda da, qolma-qol da berýge bolady.
Zalaldy óteý týraly ótinimge mynalar qosa beriledi:
1) jer ýchaskesine sáıkestendirý qujatynyń kóshirmesi;
2) jer ýchaskesine quqyq belgileıtin qujattyń kóshirmesi.
Ótinishpen birge tapsyrylǵan qujattardyń talapqa sáıkestigi 2 jumys kúniniń ishinde tekserilip, ótinim berýshiniń elektrondy poshtasyna habarlama jiberiledi. Eger qujattar talapqa saı bolmasa, habarlamada qujattardyń qandaı talaptarǵa sáıkes kelmeıtini kórsetiledi.
Bul kemshilikterdi joıyp, qujatty tolyqtyrýǵa taǵy 2 beriledi. Osy aralyqta qujattar tolyqtyrylmasa, naqty sebepterin kórsete otyryp, ótinimdi odan ári qaraýdan bas tartylǵany týraly habarlama joldanady.
Qujattardy qaraý merzimi ótkennen keıin qujattar komıssııanyń qaraýyna bir kúnge beriledi. Komıssııa músheleri on jumys kúni ishinde jeke nemese zańdy tulǵanyń jer ýchaskelerine tekserý júrgizip, tabıǵı sıpattaǵy tótenshe jaǵdaı saldarynan zardap shekken daqyl alqaptaryn aralaıdy. Apat saldarynan kelgen rastaıtyn fotosýretter men beınematerıaldardy mindetti túrde qosa bere otyryp, tekserý aktisi resimdeledi.
Tabıǵı sıpattaǵy tótenshe jaǵdaıdan kelgen shyǵyn mynadaı formýla boıynsha esepteledi:
U = T *R – S,
mundaǵy:
U – shyǵyn mólsheri, 1 gektarǵa teńge;
T – aýyl sharýashylyǵy daqyldaryn ósirýge arnalǵan tehnologııalyq kartaǵa sáıkes 1 (bir) gektarǵa aýyl sharýashylyǵy daqylyn ósirýge shekken shyǵyn mólsheri;
R – aýyl sharýashylyǵy daqyldarynyń zardap shekken orny, ósirilip otyrǵan daqyldar aýmaǵy;
S - alynǵan sýbsıdııalar kólemi, teńge.
«Aýyl sharýashylyǵy daqyldaryna júrgizilgen zerdeleý qorytyndysy boıynsha komıssııa tabıǵı sıpattaǵy tótenshe jaǵdaıdan zardap shekken jeke nemese zańdy tulǵalardyń tizbesin jasaıdy.
Komıssııa sheshimi qabyldanǵannan keıin 2 (eki) jumys kúni ishinde tabıǵı sıpattaǵy tótenshe jaǵdaıdan zardap shekken jeke nemese zańdy tulǵalardyń tizbesi oblystyń, respýblıkalyq mańyzy bar qalanyń, astananyń jergilikti atqarýshy organynyń resmı ınternet-resýrsynda ornalastyrylady», - dep jazylǵan qujatta.
