Úıin tastap, ýaqytsha kóshirilgender sany 111 myńnan asty

ASTANA. KAZINFORM – Tótenshe jaǵdaılar mınıstrligi azamattyq qorǵanys jáne áskerı bólimder komıtetiniń aǵa ofıtseri Erasyl Saıpash tasqyn saldarynan úıin tastap shyqqan 11 950 adamnyń baspanasyna qaıtqanyn aıtty. 

«Sý tasqyny bastalǵannan beri 111 194 adam, onyń ishinde 39 222 bala qaýipsiz jerge jetkizildi. Ýaqytsha ornalastyrý pýnkterinde 6 814 adam, onyń ishinde 2 995 bala ornalasqan. 11 950 adam úıine oraldy», - dedi ol.

Erasyl Saıpashtyń sózinshe, 9 mln 500 myńnan astam tekshe metr qar sýy soryp shyǵarylǵan. 

«Sondaı-aq, 2 mln 200 myń qap, 1 mln 200 tonna ınertti materıal tóseldi. Búgingi tańda avarııalyq qutqarý jumystarynda 33 334 adam, 4 066 tehnıka, onyń ishinde 835 sý soratyn qural, 275 júzý quraly, 11 áýe kemesi jumys istep jatyr», - dedi TJM ókili.