Tasqynmen kúresý tásilin ózgerttik – Marat Ahmetjanov

ASTANA. KAZINFORM — Aqmola oblysynyń turǵyndary men ınfraqurylymdy sý tasqynynan qorǵaýǵa baǵyttalǵan qandaı jumys istelip jatyr? Bul saýalǵa óńir ákimi Marat Ahmetjanov jaýap berdi. 

— Sý tasqynyna qarsy qaýipsizdik sharalary basym baǵyt. Bizdiń óńirde 494 kól men 111 ózen bar. Biz bıyl tásildi ózgerttik, ıaǵnı sý tasqynymen kúresýden olardyń sebepterin joıýǵa kóshtik. Bıyl turǵyndar pen ınfraqurylymdy qorǵaýǵa baǵyttalǵan aýqymdy jumys atqaryldy. Atap aıtqanda, Qalqutan, Nura, Shaǵalaly, Jabaı ózenderin tazalaý jáne túbin tereńdetý jumystary júrgizildi. Oblysta 44 shaqyrymdy quraıtyn ózender tazartyldy, sol sııaqty 18 qaýipti, ári mańyzdy gıdrotehnıkalyq qurylystar nyǵaıtylyp, qalpyna keltirildi, — dedi Marat Ahmetjanov ortalyq kommýnıkatsııalar qyzmeti alańynda óńirdiń áleýmettik-ekonomıkalyq damý áleýeti týraly esep bere turyp.

Ákimniń aıtýynsha, joǵaryda atqarylǵan is kóktemde 80 mln tekshe metr erigen qar men tasyǵan ózen sýyn ýaqtyly meńgerýge múmkindik beredi.

— Óńirde Astrahan, Sandyqtaý jáne Zerendi aýdandarynda sý basý qaýpi bar aımaqtardan 37 otbasy qaýipsiz ýchaskelerge kóshirildi. Renovatsııa baǵdarlamasy aıasynda Bulandy aýdanynda qaýip-qater aımaqtarynda turǵan úılerden (Makınsk qalasy) qosymsha 53 otbasyn kóshirý josparlanyp otyr. Bul baǵyttaǵy jumys jalǵasyn tabady, — dep tolyqtyrdy oblys ákimi.

Buǵan deıin habarlaǵanymyzdaı bıyl 7 myńnan astam aqmolalyq turǵyn úı jaǵdaıyn jaqsartty.

Bıyl Aqmola oblysynyń dıqandary rekordtyq kólemde astyq jınady. 

Aıta keteıik, Aqmola oblysynda astyqty tereń óńdeıtin alǵashqy zaýyt qurylysy bastaldy. 

Sondaı-aq 2026 jyly Qosshyda jańa elektr energııasy stantsııasy salyna bastaıdy.