Tasqynmen kúreske qansha tehnıka tartyldy
ASTANA. KAZINFORM – Tótenshe jaǵdaılar vıtse-mınıstri Baýyrjan Syzdyqov tasqynmen kúres jumystaryna qansha tehnıka tartylǵanyn málim etti.
«Búgingi tańda sý tasqynyn joıýǵa 32 myńnan astam adam, 5 myńǵa jýyq tehnıka, 310 júzý quraldary men 13 tikushaq tartyldy. Qorǵanys, Іshki ister mınıstrlikterine, Ulttyq qaýipsizdik komıtetine, Memlekettik kúzet qyzmeti men Ulttyq Ulanǵa sý tasqynyn joıýdaǵy qosqan úlken úlesi úshin alǵysymyzdy bildiremiz. 10 óńirge avarııalyq jáne shuǵyl jumystardy úzdiksiz júrgizý úshin kóptegen arnaıy tehnıkalar men basqa da múlikter jedel bronnan shyǵaryldy. Osy jáne ózge de qosymsha kúshter «Qazaqstan temir» joly arqyly óńirlerge ýaqytyly jetkizildi. Qazir keıbir kúshter óz aımaqtaryna oralyp jatyr», - dedi ol Úkimet otyrysynda.
Sondaı-aq, ol vedomstvo mamandary ákimdiktermen birlesip zardap shekkenderdiń materıaldyq shyǵynyn eseptep jatqanyn atap ótti.
«Biz táýlik boıy sý qoımalaryna monıtorıng júrgizýdi jalǵastyrýdamyz. Azamattardyń qaýipsizdigin qamtamasyz etý jáne sý basý qaýpin azaıtýdyń barlyq qajetti sharalaryn qabyldaımyz», - dedi Baýyrjan Syzdyqov.
