Tasqynmen kúres jáne onyń saldaryn joıý ońaıǵa soqqan joq – BQO ákimi

ASTANA. KAZINFORM – Batys Qazaqstan oblysy kóktemde tasqyn sýdan zardap shekken óńirlerdiń biri. Óńirde jol qatynasy úzildi, biraz adam baspanasyz qaldy. Degenmen jedel sharalar men ýaqtyly sheshim qabyldaýdyń nátıjesinde tasqyn saldary joıylyp jatyr. Tasqynmen kúres týraly tolyǵyraq Batys Qazaqstan oblysynyń ákimi Narıman Tóreǵalıev aıtyp berdi.

«Sý tasqyny saldarynan 2 myńǵa jýyq turǵyn úı jáne 15 myńdaı saıajaı ýchaskeleri sý astynda qaldy. Ýaqtyly qabyldanǵan sharalardyń arqasynda 9994 otbasyǵa 3,6 mlrd teńge kóleminde birjolǵy áleýmettik kómek tólendi. Budan bólek, 10 myńnan astam otbasyǵa keltirilgen shyǵyndarǵa 3,7 mlrd teńgege materıaldyq kómek berildi. Turǵyndardyń baspanasyn qalpyna keltirý jumystaryn júrgizý úshin 4,3 mlrd teńgege jóndeý jumystary júrgizildi. Jalpy sany 1939 páter satyp alyndy jáne 889 jańa turǵyn úı salyndy», - dedi Narıman Tóreǵalıev Ortalyq kommýnıkatsııalar qyzmeti alańynda ótken baspasóz máslıhatynda. 

Odan bólek, qaıyrymdylyq qorlary esebinen 69 januıaǵa jańa baspana berildi. 

«Osy oraıda qıyn sátte qol ushyn sozǵan barsha azamattarǵa jáne demeýshilerge alǵys aıtamyn. Tasqynmen kúres jáne onyń saldaryn joıý, turǵyn úılerdi, áleýmettik nysandardy qalpyna keltirý ońaıǵa soqqan joq», - deıdi ol.