Tasqyn zardabyn joıýǵa Úkimetten 19,2 mlrd teńge surap otyrmyz — Ashat Shaharov

AQTÓBE. KAZINFORM — Aqtóbede sý tasqynynyń saldaryn joıýǵa 66,2 mlrd teńge jumsalady. Munda turǵyn úı salýmen qatar, mektep, sport kesheni men jol jóndeý jumystary da bar.

Aqtóbede sý tasqyny kezinde 4 myńnan astam otbasy zardap shekse, olardyń myńnan astamynda úıi jaramsyz bolyp qaldy.

Qazir 511 úı salynyp jatyr.

Aqtóbe oblysy máslıhat depýtattarynyń aldynda jarty jyldyqty qorytyndylaǵan Ashat Shaharov shyǵyn kólemi men atqarylǵan jumysty aıtyp berdi. 

— Jyl basynda úlken qıyndyqqa tap boldyq. Apat aıtyp kelmeıdi. Prezıdenttiń tapsyrmasy boıynsha biz aldymen apatqa tótep berý jumysyn júrgizdik. Qazir qalpyna keltirý jumysy atqarylyp jatyr. Oblysta 4 myńnan astam otbasy zardap shekti. 511 úı salynyp jatyr. 400-den astam otbasy daıyn úı satyp aldy. Jumys jalǵasady. Jalpy sý tasqynynyń saldaryn joıýǵa 66,2 mlrd teńge qajet. Demeýshilerdiń, bıýdjettiń kómegimen jumys atqarylyp jatyr. Al ınfraqurylym, sonyń ishinde bóget jóndeýge 2 mlrd teńgeden astam qarjy respýblıkadan suraldy. Jalpy respýblıkalyq bıýdjetten, Úkimettiń rezervinen 19,2 mlrd teńge surap otyrmyz. Qoldaý bar. Bastapqy qarjy keldi. 1 mlrd teńge sý tasqyny kezinde zadap shekken bıznes nysandarynyń shyǵynyn óteýge baǵyttalyp otyr, — dedi Aqtóbe oblysynyń ákimi Ashat Shaharov.

Al 3500 otbasynyń materıaldyq zalalyn óteý úshin bıýdjetten 1 mlrd teńge bólindi. Sonymen birge 4500 otbasynyń bári birjolǵy tólem aldy. 

— 4500-ge jýyq mal basy shyǵynyn óteý úshin bıýdjetten 1,1 mlrd teńge bólindi. Bul baǵytta birneshe jumys atqaryldy. Tirkeý bazasynda bar, syrǵasy bar, óleseksi bar adamdar aldymen shyǵynyn ótep aldy. Sonymen birge kýágerler bolsa, shyǵynyn komıssııaǵa dáleldese biz bıýdjetten tys qarjy daıyndap qoıdyq. Búgingi kúni ınfraqurylymdy jobalaý, saraptaý, salý jónindegi is shara bekidi. Bul jumystarǵa 36 mıllard teńge bólinip otyr. 2 densaýlyq saqtaý, 13 bilim berý, 3 mádenıet, 2 sport nysandary men 47 shaqyrym jol qalpyna keltiriledi. Sonymen birge kópirler men jolǵa qubyr salý, bóget qurylysy júrip jatyr, — dedi Ashat Shaharov.

Eske salsaq, Aqtóbe oblysy ákimdigi men Otbasy bank birlesip 1,5 mlrd teńge bóledi. Oǵan 100 otbasynyń baspana alýyna múmkindik jasalady.