Tasqyn sýdyń arty qandaı ekologııalyq apatqa jalǵasýy múmkin

ASTANA. KAZINFORM – El óńirlerinde tasqyn sýdyń beti qaıtyp keledi, endigi jumys onyń saldarymen kúres. Osy oraıda Májilis depýtaty Maqsat Tolyqbaı tasqyn sýdan keıingi ekologııalyq qaýip-qaterge alańdaýshylyq tanytty.

«Men búgin tazalyq máselesin kótergim kelip otyr, sebebi, elge tasqynmen birge endi topalań keledi. Qarǵyn sýdan qorǵaný úshin myńdaǵan qap pen paketterden bóget turǵyzyldy, polıetılen klenkalardy paıdalandyq. Endi sý ketken soń osy kenep qaptardy túgin qaldyrmaı, túgel jınap almasaq, ekologııalyq apatqa tap bolamyz. Onyń ústine saı-saladan kelgen sý qanshama kúl-qoqys, qaldyq, ań-qus pen maldyń ólekselerin aǵyzyp áketti. Osy jemtikterdi zalalsyzdandyrmasaq, jańaǵy men aıtyp otyrǵan topalań qurǵyr túrli dert pen aýrýdy taratýy múmkin», - dedi Maqsat Tolyqbaı Májilistiń jalpy otyrysynda depýtattyq saýal joldap. 

Sondaı-aq, halyq qalaýlysy «Taza Qazaqstan» tazalyq aılyǵy aıta kele, «Áleýmettik jelilerdegi ádemi rolıkter úshin jasalatyn bir rettik aktsııa bolmaýy kerek», degen Prezıdent sózin eske saldy. 

«Batys elderin aıtpaı-aq, kórshi ózbek aǵaıyndardyń tazalyǵyna tań qalamyz. Al mundaı muntazdaı tazalyq ózinen-ózi jasalmaıdy. Tazalyqty árbir azamattyń ózinen, óz jaýapkershiligin sezinýinen, tártipti saqtaýynan bastalady. Tazalyqqa jaýapty mekemelerdiń jumysynan bólek, turǵyndar kóringen jerge qoqys tastap, kósheler men aýlalardy lastap kete beretin bolsa, nátıje bolmaıdy», - deıdi ol. 

Myna Almatynyń irgesindegi «Altyn Orda» bazarynyń kúl-qoqysqa toly ekenin aıtty. 

«Terezeni ashyp temekini laqtyra salamyz, túkire salamyz, stadıon, kınoteatrǵa baorsaq ta, ishken jegenimiz sol jerde qalady, kókke shyqsaq ta sol. Ulttyq parkterdiń bári qoqys. Odan qalsa, úıdegi qoqysty sasytyp, podezge tastaı salatyn nadandar bar. Sol úshin sanany ózgertýimiz kerek. Tazalyqty kádimgi qundylyq, tipti, kerek bolsa tártip retinde dáripteýimiz kerek», - dedi depýtat. 

Sóz sońynda Maqsat Tolyqbaı joǵaryda atalǵan máseleni sheshý úshin Úkimet basshysynyń nazaryna kelesi usynystardy alǵa tartty: 

1. Úkimet qoǵamda tazalyq saqtaý mádenıetin qalyptastyrýǵa arnalǵan keshendi baǵdarlama ázirlep, iske asyrýy kerek.
2. Jergilikti atqarýshy organdar ózderine qarasty aýmaqtardy abattandyrýdy turaqty júrgizip, jasyl jelek egýmen ǵana shektelmeı, ony kútip-baptaý isine de kóńil bólýi tıis.
3. Oqý-aǵartý mınıstrligi orta mektep oqýshylary arasynda «Ekologııalyq sana» atty aǵartýshylyq synyp saǵattaryn ótkizýdi jolǵa qoıǵany jón.