Tasqyn sýdy kádege jaratý: eldiń bes oblysynda zertteý júrgizildi
ASTANA. KAZINFORM — Qazaqstannyń bes oblysynda kóktemgi tasqyn sýdy jer astyna jınap, sý qoryn tolyqtyrý múmkindigi zertteldi. Bul týraly Quryltaı depýtaty Aıgúl Sqaqova halyqaralyq konferentsııada aıtty.
Depýtattyń aıtýynsha, Qazaqstanda kóktemde sý tasqyny bolǵan óńirlerdiń ózi jazda sý tapshylyǵyna tap bolýy múmkin. Sondyqtan ǵalymdar tasqyn sýdy tek qaýip retinde emes, saqtap, keıin paıdalanýǵa bolatyn resýrs retinde qarastyrýdy usynyp otyr.
— Kóktemde Qazaqstannyń keıbir óńirlerinde aýqymdy sý tasqyny bolady, al jazda sol aýmaqtardyń ózinde sý tapshylyǵy sezilýi múmkin. Osy oraıda tasqyn sýdy tek qaýip retinde emes, saqtaýdy úırenýimiz qajet resýrs retinde qarastyra alamyz ba degen suraq týyndaıdy, — dedi Aıgúl Sqaqova.
Onyń aıtýynsha, osy máseleni zertteýge arnalǵan ǵylymı joba Jambyl, Almaty, Jetisý, Abaı jáne Shyǵys Qazaqstan oblystaryn qamtyǵan.
Jobanyń negizgi maqsaty — tasqyn sýdy jer astyndaǵy sý qabattaryna jınaý múmkindigin anyqtaý. Halyqaralyq tájirıbede bul tásil Managed Aquifer Recharge, ıaǵnı jerasty sý qoryn basqarylatyn ádispen tolyqtyrý dep atalady.
Zertteý barysynda ǵalymdar spýtnıktik derekterdi, geoaqparattyq júıelerdi, jer bederiniń tsıfrlyq úlgilerin jáne gıdrogeologııalyq modeldeý ádisterin paıdalanǵan. Sonyń kómegimen tasqyn sýdy jınaýǵa qolaıly aýmaqtardy anyqtaý múmkindigi qarastyrylǵan.
Aıgúl Sqaqovanyń sózinshe, bıyl aıaqtalǵan ǵylymı jobanyń nátıjelerin Ǵylym komıtetine tapsyrý josparlanyp otyr. Bul derekter aldaǵy ýaqytta sý resýrstaryn basqarý salasyndaǵy zertteýler men jańa sheshimderdi ázirleýge paıdalanylýy múmkin.
Aıta keteıik, buǵan deıin osy jıynda Quryltaı depýtaty aýyl sharýashylyǵy salasyndaǵy ǵylymı jobalardy qarjylandyrý merzimin qazirgi 3 jyldan 5–10 jylǵa deıin uzartýdy usynǵan edi.
