Tasqyn sýdan zardap shekken Atbasar aýdany men Kókshetaý turǵyndary baspanaly boldy
KÓKShETAÝ. KAZINFORM - Aqmola oblysynda sý tasqynynan zardap shekken turǵyndardy turǵyn úımen qamtamasyz etý jumystary jalǵasyp jatyr. Búgin Atbasar aýdanynda 27 otbasy jáne Kókshetaý qalasynda 13 otbasy baspanaly boldy.
Páter kiltin Aqmola oblysynyń ákimi Marat Ahmetjanov saltanatty túrde tabys etti.
«Memleket basshysy Qasym-Jomart Toqaev tabıǵı apattan zardap shekken azamattarǵa qamqorlyq jasaý jóninde tapsyrma bergen bolatyn. Búgingi tańda Aqmola oblysynda osy tapsyrmany oryndaý aıasynda aýqymdy jumystar júzege asyrylyp jatyr. Sonyń eń bastysy tasqyn sýdan úıleri jaramsyz bolyp qalǵan turǵyndardy baspanamen qamtamasyz etý, materıaldyq zalal kelgen adamdarǵa birjolǵy kómek kórsetý der edim. Búgingi páter kiltin tapsyryp otyrǵanymyz sonyń bir aıǵaǵy ispettes. Sonymen birge, búlingen úıler men ınfraqurylymdy qalpyna keltirý boıynsha da úlken jumys kútip tur», - dep atap ótti M.Ahmetjanov.
Baspanaly bolǵandardyń arasynda Borısovka aýylynyń turǵyny Natalıa Zaıka bar. Kóp balaly ana jańa úıdi sý baspaıtyn aýmaqtan ózi tańdap otyr.
«Tótenshe jaǵdaıdan keıingi alǵashqy kúnderi biz barlyq memlekettik organdardyń kómegi men qamqorlyǵyn sezindik. Prezıdent Qasym - Jomart Toqaevqa zardap shekkender boıynsha jedel sheshim qabyldaǵany úshin alǵysymdy bildirgim keledi», - dedi turǵyn.
Sonymen birge, osy kúni Kókshetaý qalasynda tasqyn sýdan zardap shekken 13 otbasy páterli boldy.
Al budan buryn oblys ortalyǵynyń 14 turǵynyna páter kilti berilgen edi.
«Kúzge deıin búlingen ınfraqurylymdy qalpyna keltirý jumystaryn aıaqtap, aımaqta zardap shekken turǵyndardy baspanamen qamtamasyz etýdi josparlap otyrmyz», - dep qorytyndylady oblys ákimi.
Aqmola oblysy ákimdigi baspasóz qyzmetiniń málimetinshe, óńirde 1500-den astam adam birjolǵy tólem aldy. Múlikti baǵalaý jumystary aıaqtalyp keledi.
Eske salaıyq, Kókshetaýda sý tasqynynan zardap shekken 8 otbasy baspanaly boldy.
