Tasqyn sý bolǵan óńirlerdiń balalary saýyqtyrý ortalyqtaryna jiberiledi

ASTANA. KAZINFORM – Sý tasqynynan zardap shekken óńirlerde 3800-den astam bala saýyqtyrý ortalyqtaryna joldanady. Bul týraly QR Oqý-aǵartý mınıstri Ǵanı Beısembaev aıtyp berdi.

«Sý tasqynynan zardap shekken óńirler balalarynyń demalysy erekshe nazarda. Búgingi kúni 628 bala demalýda. Aldaǵy ýaqytta 3 883 bala saýyqtyrý ortalyqtaryna joldanady», - dedi Oqý-aǵartý mınıstri Úkimettiń búgingi otyrysynda.

Sonymen birge, «Qazaqstan halqyna» qorynyń qoldaýymen 20 myń bala tegin demalýǵa múmkindik alady.

Onyń ishinde sý tasqynynan zardap shekken óńirlerdiń oqýshylaryna, halyqtyń áleýmettik osal toptarynan jáne kóp balaly otbasynan shyqqan aýyl balalaryna basymdyq beriledi.

Aıta keteıik, bıyl elimizde 10 myńnan astam demalys ornynda 3 mln-ǵa jýyq bala jazǵy demalysyn ótkizedi.

Jazǵy demalysty mazmundy uıymdastyrý maqsatynda 120 myń uıymdastyrýshy-pedagog arnaıy daıyndyqtan ótti. Oǵan qosymsha 12 myńnan astam stýdentter jáne eriktiler tartylmaq.