Tasqyn sý basqan respýblıkalyq joldardy jóndeýge 8,5 mlrd teńge kerek – Marat Qarabaev

ASTANA. KAZINFORM – Qazir sý shaıǵan joldardy jóndeý aldynda dıagnostıka jumystary júrip jatyr. Tolyǵyraq Kólik mınıstri Marat Qarabaev aıtyp berdi. 

«Tasqyn sý astynda qalǵan 11 jol ýchaskesi bar, olardyń uzyndyǵy – 33 shaqyrym. Keıbir jol ýchaskelerin sý shaıyp ketti, keıbir joldy aǵyn sýdy jiberý úshin qoldan buzdyq. Respýblıkalyq mańyzy bar joldar boıynsha qalpyna keltirý quny shamamen 8,5 mlrd teńgeni quraıdy», - dedi Májilistiń alańynda BAQ ókilderiniń saýalyna jaýap bergen Marat Qarabaev. 

Mınıstrdiń aıtýynsha, qazir sý basqan joldarǵa dıagnostıka júrgizilýde. 

«Jergilikti mańyzy bar joldar boıynsha 275 ýchaskeni sý shaıdy, oǵan qosymsha 20 mlrd teńge bólinedi. Qazir sý basyp qatynassyz qalǵan jol ýchaskeleri joq, barlyq ýchaskesi qalpyna keltirildi», - deıdi ol. 

Buǵan deıin M. Qarabaev Vietjet Air áýe kompanııasy Qazaq Air-dyń 38 mlrd teńge qaryzyn japqanyn aıtqan edi.