Tasqyn sý basqan Qulsarynyń turǵyndary aýdandyq ákimdik aldyna jınaldy

ATYRAÝ. KAZINFORM – Qulsary qalasynda tasqyn sýdan zardap shekken turǵyndar Jylyoı aýdandyq ákimdiginiń aldyna jınaldy. 

Atyraý oblysynyń jedel shtabynan málim etkendeı, turǵyndar ótemaqy tóleý, jańa baspana berý máselesin kótergen. Jınalǵandarmen Jylyoı aýdanynyń ákimi Jumabek Qarajanov kezdesti. 

«Jylyoı aýdanynda 2 920 úıdi sý bastqan. Qazir onyń 2 906-sy sýdan tazartyldy. Búginge deıin tasqyn sý kirgen 2 667 turǵyn úıge tehnıkalyq zerdeleý, 2 622 turǵyn úıge baǵalaý júrgizildi. Turǵyndardan 3 myńǵa jýyq ótinish tústi. Sý tasqynynan zardap shekken 3 904 turǵynǵa 100 aılyq eseptik kórsetkish mólsherinde birjolǵy tólem berildi», - dep habarlady oblystyq jedel shtabtan. 

Sondaı-aq 289 kásipkerge zalaldy óteý boıynsha keńes berilgen.

«Búgin tústen keıin arnaıy mamandar ár turǵynnyń úıine barady. Olar turǵyn úıdi tehnıkalyq zerdeleý jáne baǵalaý qorytyndysymen tanystyrady», - dep málim etti oblystyq jedel shtabtan.

Eske sala ketelik, buǵan deıin Qulsaryda qurylysy bitpegen 14 úı men 7 kásipkerlik nysan áli sý ortasynda turǵanyn habarlaǵan edik.