Tasqyn sý basqan 40 bilim oshaǵynyń 5-i ǵana qalpyna keltirilgen

ASTANA. KAZINFORM – Búginde elimiz boıynsha 280 mektep kúrdeli jóndeýden ótip jatyr. Bul týraly Oqý-aǵartý mınıstri Ǵanı Beısembaev málim etti.

«222 mektepte kúrdeli jóndeý jumystary oqý jylynyń basyna deıin aıaqtalýy tıis. Al, 58-de qurylys-montajdaý jumystarynyń belgilengen merzimderine sáıkes aıaqtaý kózdelgen. Sonymen qatar, mınıstrlik júrgizgen monıtorıng sheńberinde 15 nysandy kúrdeli jóndeý ýaqtyly aıaqtalatynyna kúmán bar. Bul Qaraǵandy, Almaty, Soltústik, Shyǵys Qazaqstan oblystary jáne Almaty qalasyndaǵy mektepter», - dedi Ǵanı Beısembaev Úkimet otyrysynda. 

Sondaı-aq, mınıstr kóktemde sý basqan óńirlerdiń oqý jylyna daıyndyǵy týraly aıtty. 

«Tasqyn sý basqan óńirlerde 40 bilim berý nysany (11 balabaqsha, 22 mektep, 7 qosymsha bilim berý nysany) zardap shekti. Búginde 5 bilim nysany boıynsha qalpyna keltirý jumystary aıaqtaldy jáne 16 nysan boıynsha jumystar júrgizilýde. Sonymen qatar, 19 nysan boıynsha qalpyna keltirý jumystarynyń ýaqtyly aıaqtalatynyna kúmán bar», - deıdi vedomstvo basshysy.