Tasqyn kezinde jeke kompanııa Perızat Qaırat basqarǵan qorǵa 100 mln teńge aýdarǵan

ASTANA. KAZINFORM – Elordada Perızat Qaırat pen anasy Ǵaını Alashbaevaǵa qatysty qylmystyq is boıynsha ótip jatqan sot protsesinde «RealBet» JShS-niń jetekshi zańgeri Damır Askarov kýá retinde jaýap berdi.

Kýáger 2024 jylǵy sý tasqyny kezinde Perızat Kaıratpen baılanysty qorǵa aýdarylǵan 100 mln teńge qarjynyń mán-jaıyn baıandady.

— Belgili bolǵandaı, sol kezde birqatar óńirde sý tasqyny boldy. Biz BAQ pen áleýmettik jelilerden jaǵdaıdy baqylap, qarapaıym azamattardyń qandaı qıyndyqqa tap bolǵanyn kórdik. Osy oraıda kompanııa basshylyǵy zardap shekkenderge kómek kórsetý jóninde sheshim qabyldady, - dedi ol sotta.

Zańgerdiń aıtýynsha, kompanııa muqtaj jandarǵa kómek kórsetý úshin qarajatty qandaı qor arqyly jiberýge bolatynyn izdeı bastaǵan. Nátıjesinde, 2024 jylǵy 17 sáýirde Fortebank bankindegi Perızat Kaırat qorynyń esepshotyna 100 mln teńge aýdarylǵan.

Keıin kompanııa qor boıynsha qylmystyq is qozǵalǵanyn bilgen. Kýágerdiń aıtýynsha, kompanııa bul jóninde Qarjylyq monıtorıng agenttigine qarajatty Perızat Kaırat qoryna aýdarǵanyn rastaǵan.

Sotta «Qorǵa aýdarylǵan qarajattyń qalaı jumsalǵany týraly esep aldyńyzdar ma?» degen suraqqa Damır Askarov: «Biz qarajattyń adal maqsatta jumsalatynyna kúmándanǵan joqpyz. Sý tasqynynan zardap shekken adamdarǵa shynymen kómektesedi dep sendik», - dep jaýap berdi kýáger.

Sot otyrysynda belgili bolǵandaı, Perızat Qaırat anasyn ortaǵa salyp, 23 mln teńgege gúl bıznesin satyp alǵan. 

Buǵan deıin «Asar-Úme» qorynyń prezıdenti Ashat Nurmashev kúdikti Perızat Qaıratqa 200 mln teńge aýdarǵanyn aıtty. 

Sondaı-aq tanymal bloger Oljas Sadyq sotta kýálik etý barysynda Perızat Qaıratqa 83,5 mln teńgege aldanǵanyn aıtty. 

Aıta ketsek, Úkimet basshysy Oljas Bektenov Perızat Qaırattyń ústinen qozǵalǵan iske qatysty pikir bildirdi.