Tasqyn kezinde evakýatsııalanǵan 560 adamnyń sozylmaly aýrýy bar - DSM

ASTANA. KAZINFORM – densaýlyq saqtaý mınıstrliginiń resmı ókili Áıgerim Orazalıeva ortalyq kommýnıkatsııalar qyzmetinde ótken brıfıngide Tasqyn kezinde evakýatsııalanǵan 560 adamnyń sozylmaly aýrýy bar ekenin málim etti.

«Sý tasqyny aımaqtarynan evakýatsııalanǵan 560 adamnyń ártúrli sozylmaly aýrýlary bar. Olar sondaı-aq ornalasqan jeri boıynsha tolyǵymen tegin dári-dármektermen qamtamasyz etilgen.

Atyraý, Qulsary qalalarynda densaýlyq saqtaý salasyndaǵy jaǵdaı turaqty. Sý tasqynyna baılanysty azamattar medıtsınalyq kómekke júgingen joq, medıtsınalyq uıymdar shtattyq rejımde jumys isteýde.

Qostanaı qalasynda sý tasqynynan zardap shekkender úshin 88 evakýatsııalyq pýnkt ashyldy. Medıtsınalyq kómekke muqtaj adamdar úshin qala statsıonarlarynda qosymsha 195 tósek-oryn ornalastyryldy.

Batys Qazaqstan oblysynda sý tasqyny qaýpine baılanysty oblystyq kardıologııalyq ortalyq ǵımaratynda emdelip jatqan patsıentter qalalyq kópbeıindi aýrýhanaǵa aýystyryldy, onda 111 tósek-oryn berildi. Barlyq 109 patsıent em alýda», - dedi resmı ókil.

Áıgerim Orazalıev Mańǵystaý óńirinde tasqynnan keıin emge júgingen turǵyndar týraly málimet usyndy.

«6 sáýirde sý basý qaýpine baılanysty Mańǵystaý oblysynyń Beıneý aýdandyq ortalyq aýrýhanasyna Jylyoı aýdandyq aýrýhanasynan 51 naýqas kóshirildi. Olardyń barlyǵy emdeý hattamalaryna sáıkes josparly kómek alýdy jalǵastyrýda. Beıneý qalasynda medıtsınalyq kómek kórsetý úshin Aqtaý qalasyndaǵy oblystyq statsıonarlardan qosymsha 8 dáriger issaparǵa jiberildi», - dedi ol.