Mashına jasaý salasy jarty jyl ishinde 11,1% ósim kórsetti
ASTANA. KAZINFORM — 2025 jylǵy alǵashqy alty aıdyń qorytyndysy boıynsha Qazaqstannyń mashına jasaý salasy 11,1% ekonomıkalyq ósim kórsetti, dep habarlaıdy Úkimettiń baspasóz qyzmeti.
16 shildede vıtse-premer — ulttyq ekonomıka mınıstri Serik Jumanǵarınniń tóraǵalyǵymen ótken Ekonomıkalyq ósýdi qamtamasyz etý jónindegi shtab otyrysy sektordyń qarqynyn odan ári jedeldetýdiń jáne qosymsha áleýetin ashýdyń múmkindigin egjeı-tegjeıli talqylaýǵa arnaldy.
Mashına jasaý óńdeýshi ónerkásiptiń negizgi sektorynyń biri retinde onyń jalpy kóleminiń 19%-yn qamtamasyz etedi. Ósýdiń negizgi draıverleri: avtomobıl (+12,1%), temirjol jáne basqa da kólik quraldary (+7,1%), aýyl sharýashylyǵy tehnıkasy (+1,3%), elektrotehnıka (+21,5%), kompıýter, elektrondyq jáne optıkalyq jabdyq (ósim 1,7 ese) óndirisi, sondaı-aq mashına jáne jabdyq jóndeý men ornatý (+12%).
Avtoónerkásip: jańa zaýyttar jáne modelder qatarynyń keńeıýi
Avtomobıl jasaý mashına jasaý kóleminiń shamamen 41%-yn beredi. Búginde elimizde JAC, Chevrolet, KIA, Lada, Jetour, Hongqi, Skoda, Hyundai jáne Genesis brendterin shyǵaratyn eki avtozaýyt jumys isteıdi.
Bıyl Qazaqstanda taǵy eki jańa kásiporyn — Almatydaǵy mýltıbrend zaýyty men Qostanaıdaǵy KIA zaýyty iske qosylady. Almatyda CHANGAN, Haval jáne CHERY sııaqty brendterdiń avtomobılderin shyǵarý josparlanýda.
— Jańa qýattardy paıdalanýǵa berýdiń arqasynda elimizde shaǵyn toraptyq tehnologııa boıynsha jınalatyn avtomobıl óndirisiniń kólemi edáýir artady. Bul modelder qataryn kóbeıtýge jáne otandyq avtoónerkásiptiń pozıtsııasyn nyǵaıtýǵa múmkindik beredi, — dedi ónerkásip jáne qurylys vıtse-mınıstri Oljas Saparbekov.
2025 jyly Qazaqstanda 147 824 avtomobıl shyǵarý josparlanyp otyr. Alaıda, vıtse-mınıstr atap ótkendeı, salada bul kórsetkishten asyp túsýdiń barlyq alǵysharty bar.
Onyń aıtýynsha, otandyq taýar óndirýshilerge sertıfıkat berýge baılanysty protsesti ońtaılandyrý kezinde qosymsha ósý múmkindigi joǵary.
Vıtse-premer Serik Jumanǵarın saýda jáne ıntegratsııa mınıstrligine qajetti ruqsat qujattamasyn jedel berý úshin shara qabyldaýdy tapsyrdy. Bul jańa modelderdiń serııalyq óndirisin ýaqtyly iske qosýǵa jáne qýattardyń júktemesiniń artýyn qamtamasyz etýge múmkindik beredi.
Temirjol mashınalaryn jasaý: jańarýǵa bet burý
Temirjol sektory mashına jasaý qurylymynda 13%-dy alady. 2024 jyly Qazaqstanda jalpy somasy 599,3 mlrd teńgege 125 lokomotıv jáne 2,7 myńnan astam vagon óndirildi. Búginde osy segmentte Astana, Petropavl, Ekibastuz jáne Atyraýda ornalasqan bes óndiristik kásiporyn jumys isteıdi.
bıyldan bastap Astanada «Stadler Kazakhstan» zaýyty jumysyn bastady. Onyń iske qosylýy salany transformatsııalaý men oqshaýlaýdy arttyrýdyń mańyzdy kezeńin jol ashyp otyr.
Jyljymaly quramdy jańartý úshin Kólik mınıstrligi qyzmet etý merzimi uzartylǵan vagondardy paıdalanýǵa shekteý engizýge bastamashy boldy. Tıisti normatıvtik qujat ázirlenip, kelisý rásiminen ótýde.
Vıtse-premer Ulttyq ekonomıka mınıstrligine qujatty qysqa merzimde qabyldaý úshin rásimdik máselelerdi sheshýdi jedeldetýdi tapsyrdy.
Elektrotehnıka men turmystyq tehnıka: damý jalǵasýda
Mashına jasaýdyń jalpy kóleminiń shamamen 9%-y elektrotehnıkalyq ónimge tıesili. 2024 jyly Qazaqstanda 270 myńnan astam turmystyq tehnıka óndirildi.
Osy jyldan bastap elimizde Samsung brendimen teledıdar men kir jýǵysh mashına óndirisi bastalady. Bul ımportty almastyrý, oqshaýlaýdy arttyrý jáne Qazaqstan aýmaǵynda shyǵarylatyn ónim assortımentin keńeıtý baǵytyndaǵy mańyzdy qadam bolmaq.
Aýyl sharýashylyǵy tehnıkasy: naryqtyń 90%-yn otandyq óndirýshiler qamtyp otyr
Aýylsharýashylyǵy mashınasyn qurastyrý sala qurylymynyń shamamen 6%-yn alady. Búginde Qazaqstanda ózdiginen júretin aýyl sharýashylyǵy tehnıkasyn 10 iri kásiporyn óndiredi. Qoldanystaǵy jeńildetilgen lızıng baǵdarlamasynyń arqasynda otandyq óndirýshiler traktor men kombaın boıynsha ishki naryq qajettiliginiń 90%-yn qamtamasyz etip otyr.
Ótken jyly fındik SAMPO, qytaılyq ZOOMLION jáne amerıkandyq John Deere Qazaqstanǵa kirip, qazir olardyń qatysýy kúsheıtilýde.
Birinshi jartyjyldyqtyń qorytyndysy boıynsha Qazaqstanda 4 myńǵa jýyq traktor (+39,3%) men 441 astyq jınaıtyn kombaın (+64,6%) óndirildi. Jyldyq jospar 10 myńnan astam aýyl sharýashylyǵy tehnıkasyn shyǵarýdy kózdeıdi. Bul ótken jylǵy kórsetkishten 27%-ǵa joǵary.
Vıtse-premer Serik Jumanǵarın óńdeý ónerkásibiniń negizgi sektorynyń biri jáne eldiń tehnologııalyq damýynyń mańyzdy draıveri retinde mashına jasaýdyń turaqty ósý qarqynyn saqtaýǵa baǵyttalǵan barlyq qajetti sharalar keshenin qamtamasyz etýdi tapsyrdy.
Buǵan deıin 2028 jylǵa qaraı Qazaqstanda mashına jasaý kólemi 4,5 esege artatyny aıtyldy.