Tasqyn qarsańyndaǵy qarbalas: Atyraýda kanaldar arshylyp, bóget salynyp jatyr
ATYRAÝ. KAZINFORM – Atyraý oblysynda sý tasqynynyń aldyn alý úshin Jem ózeni men Qursaı kanaly tereńdetilip jatyr. Al uzyndyǵy 80 shaqyrym Aqsaı kanalyna jóndeý júrgizildi.
Atyraý oblysy ákiminiń orynbasary Marat Mýrzıevtiń málimetinshe, Aqsaı kanaly Inder aýdanynda ornalasqan. Kanal 1984 jyly paıdalanýǵa berilgen.
– Bul – kanalǵa sońǵy 40 jylda júrgizilgen aýqymdy jumys. Endi onyń nátıjesi qandaı bolady? Aldymen kúrdeli jóndeýden soń sharýalardy sýmen qamtý úzdiksiz júrgiziledi. Ekinshiden, mal sýarýǵa sý berý sapasy jaqsarady. Qazir kanaldyń bas bóliginde 2 agregaty bar NAPE-1,1 markaly júzbeli nasos stansasy qoıyldy. Kanaldyń jańǵyrtý jobasy jasaqtalyp, onyń qurylysyna Sý resýrstary jáne ırrıgatsııa mınıstrligi arqyly respýblıkalyq bıýdjetten 2022-2024 jyldary 1058,9 mln teńge qarjy bólindi, -dep habarlady Marat Mýrzıev.
Onyń aıtýynsha, bólingen qarjyǵa kanal arnasy arshylyp, 8 sý qoımasy (kotlovan) tazalanǵan. Onyń ishinde 4-eýi jańadan qazylǵan. Al 4-eýi burynnan bar.
– Kanal bastaýyndaǵy júzbeli nasos kúrdeli jóndeýden ótkizlip, jańa transformator ornatyldy. Sý esepteıtin 1 gıdrobeket turǵyzylyp, nasos stansanyń aýmaǵy qorshaldy. Sý rettegish 1 gıdrotehnıkalyq qurylǵy, 9 ótkel jańadan turǵyzyldy. Osyndaı aýqymdy jumystyń nátıjesinde Aqsaı kanalynan aýyl sharýashylyǵy taýaryn óndirýshilerdiń suranysyna sáıkes 1 myń 400 gektar sýarmaly egistikke, 60 myń gektar jaıylymdyq alqapqa sýdy úzdiksiz jetkizýge bolady, -dep málim etti Marat Mýrzıev.
Al oblystyq qurylys, sáýlet jáne qala qurylysy basqarmasynyń basshysy Nurbergen Qusaıynovtyń aıtýynsha, Qursaı kanaly men Jem ózeniniń arnasyn tereńdetý jobasy iske asyrylyp jatyr. Sý arnasynyń ekeýi de Jylyoı aýdanynda ornalasqan.
– Jalpy uzyndyǵy 95 shaqyrymdy quraıtyn joba aıasynda Qursaı kanalynyń 46,1, al Jem ózeniniń 48,9 shaqyrymyn tereńdetý josparlandy. Atalǵan joba josparyna sý arnalalarynyń jaǵalaýyna 61 shaqyrym bóget salý engizildi. Osy kezge deıin Qursaı kanalynyń 34,6, Jem ózeninde 30,8 shaqyrym túbi tereńdetildi. Jaǵalaýda 61 shaqyrym bógettiń úshten birin salý aıaqtaldy, -dedi Nurbergen Qusaıynov.
Jylyoı aýdanyndaǵy bul jumys byltyrǵy tamyzda bastalǵan. Bul iske iske 450 adam men 204 tehnıka tartylǵan.
– Jem ózeniniń jaǵalaýyndaǵy bógetti salýdaǵy maqsat – Qulsary qalasyn tasqyn sýdan qorǵaý. Qazir bóget atalǵan monoshahardy aınala salynyp jatyr. Tasqynnyń aldyn alý jumystaryn kóktemge deıin aıaqtalady, - deıdi Nurbergen Qusaıynov.
Eske sala ketelik, budan buryn Atyraý oblysynda kóktemgi sý tasqynyna daıyndyq týraly jazǵan bolatynbyz.
