Tasqyn búldirgen úılerdiń ornyna 80 jáne 160 sharshy metrlik úıler salynady - mınıstrlik
ASTANA. KAZINFORM – Ónerkásip jáne qurylys mınıstrliginiń resmı ókili Merýert Ibraeva tasqynnyń saldarynan búlingen úılerdiń ornyna qandaı baspana salynatynyn aıtty.
«Keshe Prezıdent Qasym-Jomart Toqaevpen kezdesý barysynda Ónerkásip jáne qurylys mınıstri Qanat Sharlapaev tabıǵı apattan zardap shekken azamattardyń turǵyn úıin qalpyna keltirý týraly tapsyrma aldy. Osy tapsyrma aıasynda mınıstrlikte jedel shtab qurylyp, jańa turǵyn úı salýdy kózdeıtin keshendi is-qımyl jospary ázirlendi», - dedi ol ortalyq kommýnıkatsııalar qyzmetinde ótken brıfıngide.
Sondaı-aq, vedomstvonyń resmı ókili atalǵan jospar aıasynda turǵyn úılerdiń eki eskızdik jobasy ázirlengenin atap ótti.
«Bireýi – 80 sharshy metrlik 3 bólmeli jeke turǵyn úı, ekinshisi – jalpy aýdany sharshy 160 metr bolatyn eki páterli turǵyn úı. Ázirlengen turǵyn úılerdiń jobalary memlekettik saraptamadan ótedi. Bul barlyq óńirlerde tıptik-jobalyq qujattama negizinde jumys júrgizýdi qamtamasyz etedi. Bul jumys kelesi aptanyń aıaqtalyp, úlgilik jobalar memlekettik saraptama qorytyndysymen qosa epsd.kz saıtynda kópshilikke usynylady», - dedi Merýert Ibraeva.
