Tashkenttiń myńdaǵan turǵyny Karımovpen qoshtasý úshin kóshege shyqty

ASTANA. QazAqparat - Ózbekstan astanasynyń birneshe myń turǵyny Islam Karımovtyń denesin áýejaıǵa alyp ótetin qalanyń ortalyq kósheleriniń boıyna shyqty, dep habarlaıdy reseılik RBK agenttigi.

Eske sala ketsek,  el bıligi Ózbekstan basshysynyń qaıtys bolǵanyn resmı keshe habarlaǵan edi. Islam Karımovty búgin Samarqand qalasyna jerleıdi.

Búgin tańerteń Tashkenttiń ortalyq kósheleriniń eki jaǵyna qoldaryna gúl ustaǵan qala turǵyndary tizildi. Qozǵalys bóligine jaqyn tusqa eki qatar polıtsııa qyzmetkerleri qoıylǵan. Kórshi kóshelerde kólik qozǵalysy toqtatylǵan. Sondaı-aq, qalada poıyzdardyń júrý kestesi de ózgertilgen. 
Feısbýkte Mýrad Nazarov atty paıdalanýshy osy jerden uıaly telefonyna túsirilgen vıdeo jarııalady. Onda memleket basshysynyń denesin Samarqand qalasyna alyp ushatyn ushaqqa alyp bara jatqan kólikter kortejin kútip alǵan myńdaǵan ózbekstandyqtardy kórýge bolady.