Tashkenttiń kireberisine 80 metrge sozylǵan kerýenniń músini qoıyldy
ASTANA. QazAqparat - Ózbekstan astanasynyń Shylanzar aýdanynda, Tashkentke kireberiste «Uly Jibek jolyndaǵy kerýen» atty músinder kompozıtsııasy ornatyldy, dep habarlaıdy UzNews.uz .
Kompozıtsııa bir-birine tirkelgen túıelermen alys saparǵa attanyp jatqan saýdagerlerdiń músinderinen quralǵan.
Shylanzar aýdany ákimdiginiń baspasóz qyzmetine silteme jasaǵan UzNews.uz-dyń habarlaýynsha, kompozıtsııa 80 metrge sozylyp jatyr. Jergilikti BAQ-taǵy keıbir habarlarda kompozıtsııanyń uzyndyǵy 700 metrge deıin jetetini aıtylady.
Kompozıtsııanyń avtory - músinshi Pavel Makarov, oǵan Sadyq Namazov kómektesken.
Kompozıtsııanyń ashylý saltanatyna Shylanzar aýdanynyń ákimi Davron Hıdaıatov jáne Týrızmdi damytý memlekettik komıtetiniń basshysy Ázız Ábdýhakımov qatysty. Sharada osy kompozıtsııa jańa týrıstik baǵyttarǵa jalǵasatyn Shylanzar týrızm kóshesiniń basy ekendigi aıtyldy.
