Tashkenttik delegatsııa elordadaǵy Dostyq úıin tamashalady

ASTANA. QazAqparat - Ózbekstan Respýblıkasynyń Olıı Májilisiniń zań shyǵarýshy palatasy delegatsııasynyń resmı sapary aıasynda Astana qalasy Qazaqstan halqy Assambleıasy ókilderimen kezdesýi ótti, dep habarlaıdy Astana qalasy ákimdiginiń resmı saıty.

Ermek Amanshaev qonaqty Qazaqstan halyq Assambleıasynyń qalalyq ortalyǵy, Dostyq úıi jáne 2007 jyly qurylǵan Astana qalasy ózbek etnomádenı ortalyǵynyń jumysymen tanystyrdy.

«Ózbek etnomádenı ortalyǵy qaladaǵy óte belsendi ortalyqtardyń biri. Osy jyly Astana qalasynyń 20 jyldyǵyn atap óttik, aldyńǵy jyly «Ekspo-2017» halyqaralyq kórmesi ótti. Bul ortalyq árkez belsendi jáne túrli sharalar ótkizedi. Qazirgi tańda ortalyqta eki óner ujymy bar. Olar: «Poıtaht» VAA jáne «Astana Ǵýnchaları» bı ansambli. Olardyń sheberligi halyqaralyq, respýblıkalyq jáne astanalyq syılyqtarmen jáne nagradalarmen marapattaldy», - dep atap ótti ákimniń orynbasary.

Al 2017 jyly «ZIE» ózbek jeksenbilik mektebi memlekettik qoldaý aldy. Ol № 53 mektep-lıtseı bazasynda jumys isteıdi.

«Bul jeksenbilik mektepte ár túrli jastaǵy balalar ózbek tili men dástúrin, mádenıetin oqıdy. Eki top qurylǵan. Oqýshylardyń sany jyl saıyn artýda. Úsh muǵalim jumys isteıdi. Etnomádenı ortalyqta «Astana Ǵýnchaları» jastar qanaty qurylǵan, onyń quramynda stýdentter men oqýshylar bar. Belsendilerdiń jalpy sany - 100-den astam adam», - dep tolyqtyrdy ol.

Ózbekstan Respýblıkasy Olıı Májilisiniń zań shyǵarýshy palatasynyń spıkeri Nýrdınjon Ismoılov túrli ulttardyń etnomádenı ortalyqtary men ózbek etnomádenı ortalyǵynyń damýy úshin jaǵdaı jasalǵany úshin alǵysyn bildirdi.

«Jańa ǵana estidim, siz bizdiń ortalyqqa materıaldyq jáne uıymdastyrýshylyq kómek kórsetedi ekensiz. Bul - úlken is, osyndaı qamqorlyq kórsetip jatqanyńyzǵa sizge kóp rahmet, biz óte qýanyshtymyz!», - dedi N. Ismoılov.

Eske sala keteıik, búgin Astanaǵa Ózbekstan Olıı Májilisiniń zań shyǵarýshy palatasynyń spıkeri Nýrdınjon Ismoılov bastaǵan delegatsııa keldi.