Tashkenttegi arhıvterde kóptegen tarıhı qujattarymyz jatyr - dotsent Sársebaı Káribaev

ShYMKENT. QazAqparat - Elbasy N. Nazarbaevtyń «Uly dalanyń jeti qyry» atty maqalasy tól tarıhymyz ben mádenıetimizdi jiktep, uly maqsattarǵa jeteleıdi. M.Áýezov atyndaǵy Ońtústik Qazaqstan memlekettik ýnıversıtetiniń kafedra meńgerýshisi, tarıh ǵylymdarynyń kandıdaty Sársebaı Káribaev atalǵan maqala týraly osyndaı pikirin bildirdi, dep habarlaıdy QazAqparat tilshisi.

Qazaqstan tarıhy kafedrasynyń meńgerýshisi, dotsent Sársebaı Óskenulynyń sózinshe, maqalada jarııalanǵan 6 iri joba tarıhı sanany jańǵyrtýǵa úlken sep bolady. Ári ótkenimizdi túgendep, bolashaqty baǵamdaýǵa jol ashady. Sonymen qatar áli kúnge deıin qol jetkize almaı júrgen kóptegen tarıhı qujattarmen tanysýǵa múmkindik beredi.

«Elimizde «Arhıv 2025» arnaıy jobasy boıynsha kóp jumys isteýimizdi qajet etedi. Máselen, «Mádenı mura» baǵdarlamasy boıynsha da kóp zertteýler júrgizildi, kóp materıaldar ákelindi. Degenmen burynǵy Keńes Odaǵyna kiretin elderde, onyń ishinde Tashkent qalasyndaǵy arhıvte bizdiń kóptegen tarıhı qujattarymyz jatyr. Ókinishke qaraı saıası jaǵdaılarǵa baılanysty ol jerdegi qujattarǵa biz jaqyndaı almadyq. Qazir kórshi eldegi bıliktiń ózgerýine baılanysty biz sol tarıhqa toly qujattarmen tanysýǵa, kerek bolsa elimizge alyp kelýge múmkindik týatyn shyǵar dep úmittenemiz»,- deıdi Sársebaı Káribaev.

Ol sondaı-aq tól tarıhymyzdy tárbıeleýshi, qoǵamdy alǵa súıreıtin qural retinde paıdalaný kerek dep esepteıdi.

«Qazaqtyń tarıhyn jas urpaqtyń, jurtshylyqtyń sanasyna jetkizý úshin tarıhı fılmder kóbirek túsirilýi qajet dep esepteımin. Sol sııaqty tarıhı oqıǵalar jelisimen, tarıhı tulǵalardy kórsetip anımatsııalyq fılmder shyǵarylsa balalardyń sanasyna tez jetetin edi. Tarıhı derekterdi taǵy da jan-jaqty zerttep, júıeleıtin bolsaq áli de kóptegen jańalyqtar ashylatyn edi», - deıdi dotsent Sársebaı Káribaev.