Tashkenttegi Islam órkenıeti ortalyǵy Gınnestiń rekordtar kitabyna endi
ASTANA. KAZINFORM — Tashkenttegi ortalyq álemdegi eń iri ıslam órkenıetiniń murajaıy dep tanylyp, Gınnestiń sertıfıkatyna ıe boldy, dep habarlaıdy Anadoly.
Marapattaý rásimine Gınnes rekordtar kitabynyń ókili jáne sýdıa Sheıda Sýbashı qatysyp, keshenniń halyqaralyq standarttarǵa sáıkestigin rastady. Sharaǵa sáýletshiler, dızaınerler, jobada jumys istegen qurylysshylar qatysty. Marapat ortalyqtyń ǵylymı keńesiniń múshelerine tabys etildi.
Sýbashıdiń aıtýynsha, nysan tarıhı murany zamanaýı mýzeı tehnologııalarymen ushtastyryp, tek eń iri mýzeı emes, sonymen qatar mádenı dıalog alańy retinde de qyzmet etedi.
Bas sáýletshi Abdýkahhor Týrdıev keshenniń arhıtektýrasy Ózbekstannyń mádenı baılyǵyn jáne onyń álemge ashyqtyǵyn kórsetetinin atap ótti. Ortalyq qazirdiń ózinde óńirdegi eń kóp baratyn mádenı-ǵylymı nysandardyń birine aınalǵan. Kún saıyn ony 5 myńǵa jýyq adam tamashalaıdy.
Ortalyq dırektory Fırdavs Abdýhalıkov bul marapat júzdegen mamannyń eńbeginiń moıyndalýy ekenin aıtyp, jobanyń júzege asýyna el prezıdenti Shavkat Mırzıeevtiń qosqan úlesin de erekshe atap ótti.
Keshen shamamen 10 gektar aýmaqty alyp jatyr, uzyndyǵy — 161, eni — 118 metr, kúmbeziniń bıiktigi — 65 metr, al jalpy aýdany 50 myń sharshy metrden asady.
Buǵan deıin Petropavlda dene shynyqtyrý pániniń muǵalimi Anatolıı Vıselskıı eki saýsaqpen kermede tartylyp turý boıynsha álemdik rekordty jańartqany týraly habarladyq.
