Tashkentte Jibek-Joly qazaq-ózbek shekara beketiniń jobasy tanystyryldy
ASTANA. QazAqparat - Búgin Qazaqstan Respýblıkasynyń Prezıdenti Nursultan Nazarbaevtyń Ózbekstan Respýblıkasyna jasaǵan sapary aıasynda Tashkentte eki el kásipkerleriniń bıznes-forýmy ótti. Baýyrlas elderdiń saýda-ekonomıkalyq yntymaqtastyǵynyń artýyna múmkindik beretin kezdesýge 500-den astam kásipker qatysty, dep habarlaıdy QazAqparat.
Sonymen qatar, Tashkent qalasynda ótken bıznes-forým sheńberinde Qazaqstanda óndiriletin ónimderiniń kórmesi ótti.
Ózbekstan astanasynda keshe bastalǵan kórmege 90-ǵa jýyq otandyq kompanııanyń ónimderi qoıylǵan. Qazaqstandyq taýaróndýshiler kórmede tamaq jáne ónerkásip, ınjenerlik, mashına jasaý, farmatsevtıka jáne qurylys zattary men hımııa, metallýrgııa, IT salalaryndaǵy 500-den astam ónimin usyndy.
«Ózekspoortalyq» kórme kesheninde ótip jatqan kórmege Ońtústik Qazaqstan oblysynyń birqatar iri kásiporyndarynyń ónimderi qoıyldy. Atap aıtqanda, kilem shyǵaratyn «Bal Tekstıl» fabrıkasynyń, un jáne sút ónimderin óndirýde kóshbasshylardyń qataryndaǵy «Altyn Dán» JShS-nyń, «Shymkent tsement» jáne «Standart tsement» zaýyttarynyń, TMD-da birinshi ashylǵan vakýýmdyq probırkalar men ekijaqty ıne shyǵaratyn «EkoFarm Interneshnl» kompanııasynyń jáne «Hımfarm» zaýytynyń, medıtsınalyq jabdyqtardyń 17 túrin shyǵaratyn «Marai E7 Group» JShS-nyń ónimderi qoıyldy», - dep málimdedi OQO ákimdiginiń baspasóz qyzmetinen.
Sonymen qosa, kórmede «AtaStroı» qurylys kompanııasy Saryaǵash aýdanyndaǵy Jibek-Joly shekara beketin jańǵyrtý jobasyn tanystyrdy. Quny 18 mln AQSh dollary bolatyn joba júzege assa, táýligine 30 myń adam emin-erkin eki el shekarasynan óte alady.
OQO ákimdigi men Kásipkerler palatasynyń uıymdastyrýymen Ózbekstan-Qazaqstan bıznes-forýmyna Ońtústik Qazaqstan oblysynan óńir basshysy Janseıit Túımebaev bastaǵan 150-den astam adam qatysty. Olardyń qatarynda memlekettik jáne qarjylyq uıymdar ókilderi, kásipkerler bar. Bıznes-forým kezinde V2V formatynda kelissózder júrgizilip, ondaǵy qatysýshylar ózara is-áreketter jaqyn bolashaqta óz nátıjesin bererine senim bildirdi.
